தமிழகத்தில் புதிய தளர்வுகள் என்னென்ன? முதல்வர் நாளை ஆலோசனை!

தமிழகத்தில் புதிய தளர்வுகள் என்னென்ன? முதல்வர் நாளை ஆலோசனை!

தமிழகத்தில் முதல்வர் மு.க.ஸ்டாலின் கடந்த 25ஆம் தேதி வெளியிட்ட அறிவிப்பில், ஊரடங்கு வரும் ஜூலை 5ஆம் தேதி காலை 6 மணி வரை அமலில் இருக்கும் என்று தெரிவிக்கப்பட்டது. அதில், வகை 1 (11 மாவட்டங்கள்), வகை 2 (23 மாவட்டங்கள்), வகை 3 (4 மாவட்டங்கள்) என கொரோனா பரவலுக்கு ஏற்ப மூன்றாக பிரிக்கப்பட்டிருந்தன. இவற்றில் ஏற்கனவே அனுமதிக்கப்பட்ட சில கடைகள்/ செயல்பாடுகளுக்கு மாலை 7 மணி வரை தளர்வுகளும், கூடுதலாக சில செயல்பாடுகளுக்கு அனுமதியும் வழங்கப்பட்டன.

இந்நிலையில் அடுத்தகட்டமாக ஊரடங்கு நீட்டிப்பு மற்றும் புதிய தளர்வுகள் தொடர்பாக மருத்துவ நிபுணர்கள் மற்றும் உயர் அதிகாரிகளுடன் முதல்வர் மு.க.ஸ்டாலின் நாளை (ஜூலை 2) ஆலோசனை நடத்தவுள்ளதாக தகவல் வெளியாகியுள்ளது. இதில் ஏற்கனவே மாலை 7 மணி வரை திறக்க அனுமதிக்கப்பட்ட கடைகள் மற்றும் செயல்பாடுகளுக்கு கூடுதலாக இரவு 9 அல்லது 10 மணி வரை நேரம் நீட்டிக்கப்படலாம்.

நோய்த்தொற்று குறைந்த மாவட்டங்களில் மட்டும் கோயில்களில் பக்தர்கள் அனுமதிக்கப்படலாம். அரசு மற்றும் தனியார் நிறுவனங்களில் பணியாளர்களின் எண்ணிக்கை தற்போதைய அளவில் இருந்து மேலும் உயர்த்தப்படலாம். திருமண மற்றும் இறப்பு நிகழ்வுகளுக்கு அதே கட்டுப்பாடுகள் தொடரலாம். ஏனெனில் இது கொரோனா பரவலுக்கு பெரிதும் வழிவகுத்துவிடும் என்று அஞ்சப்படுகிறது.

கட்டுப்பாடுகளும் அவசியம்

நோய் தொற்று குறைந்த மாவட்டங்களுக்கு இடையிலான இ-பாஸ் முறை ரத்து செய்யப்படலாம். முன்னதாக 27 மாவட்டங்களில் மட்டும் 50 சதவீத பயணிகளுடன் பொது போக்குவரத்து பயன்பாட்டிற்கு அனுமதிக்கப்பட்டது. இதனை பிற மாவட்டங்களுக்கு உள்ளேயும், மாவட்டங்களுக்கு இடையேயும் விரிவுபடுத்தலாம். பள்ளி, கல்லூரிகள் திறப்பு குறித்து துறை சார்ந்த அமைச்சர்கள் தனித்தனியே ஆலோசனை நடத்தி வருகின்றனர்.