லடாக்கில் சீனா அத்துமீறலா? இந்திய ராணுவம் விளக்கம்!
கிழக்கு லடாக்கில் சீன ராணுவம் அத்து மீறியதாக பரவி வரும் செய்தி உண்மையல்ல என, இந்திய ராணுவம் விளக்கம் அளித்துள்ளது.
கடந்தாண்டு ஜூன் மாதம் 15ம் தேதி, ஜம்மு - காஷ்மீரின் கிழக்கு லடாக்கின் கல்வான் பகுதியில் இந்திய, சீன படைகளுக்கிடையே மோதல் வெடித்தது. இதில், இந்திய ராணுவத்தைச் சேர்ந்த 20 வீரர்கள் கொல்லப்பட்டனர்.
கிழக்கு லடாக்கின் பல்வேறு பகுதிகளில் கடந்த ஆண்டு மே மாதத்தில் இருந்து இந்திய, சீன ராணுவப் படைகளுக்கு இடையே மோதல் போக்கு நீடித்து வந்தது. தொடா்ச்சியான பேச்சுவாா்த்தைக்குப் பிறகு இரு நாடுகளும் தங்கள் படைகளை கடந்த பிப்ரவரியில் விலக்கிக் கொண்டன.
இந்நிலையில், கிழக்கு லடாக்கில் உள்ள கல்வான் பள்ளத்தாக்கில், இந்தியா - சீனா ராணுவத்தினரிடையே மீண்டும் மோதல் ஏற்பட்டுள்ளதாக தகவல்கள் வெளியாகின. இந்நிலையில் இந்த தகவலை இந்திய ராணுவம் திட்டவட்டமாக மறுத்துள்ளது.
இது குறித்து இந்திய ராணுவம் வெளியிட்டுள்ள அறிக்கையில் தெரிவிக்கப்பட்டுள்ளதாவது:
சீன ராணுவம் அத்துமீறியதாக கூறப்படும் செய்தி உண்மையானதல்ல. சர்ச்சைக்குரிய பகுதியை தாண்டி இந்திய ராணுவமும் செல்லவில்லை. கடந்த பிப்ரவரி மாதம் பேச்சுவார்த்தைக்கு பிறகு இந்தியா - சீனா ராணுவம் எல்லை மீறவில்லை. எல்லைப் பிரச்னை குறித்து பேச்சுவார்த்தை நடைபெற்று வருகிறது. இந்த பிரச்னைக்கான தீர்வை பேச்சுவார்த்தை மூலம் எட்டப்படும்.
இவ்வாறு அதில் தெரிவிக்கப்பட்டுள்ளது.
No comments:
Post a Comment