ரோல்ஸ் ராய்ஸ் கார்... ஃபாரீன் டாலர்... ரூ.30 லட்சம் மணல்: கே.சி.வீரமணி மீது இறுகும் பிடி!

ரோல்ஸ் ராய்ஸ் கார்... ஃபாரீன் டாலர்... ரூ.30 லட்சம் மணல்: கே.சி.வீரமணி மீது இறுகும் பிடி!

அதிமுகவில் அடுத்த குறியாக முன்னாள் அமைச்சர் கே.சி.வீரமணி லஞ்ச ஒழிப்புத்துறை சோதனையில் சிக்கியுள்ளார். சென்னை, ஜோலார்பேட்டை, திருப்பத்தூர் உள்ளிட்ட இவருக்கு சொந்தமான இடங்களில் லஞ்ச ஒழிப்புத்துறை அதிகாரிகள் இன்று காலை முதல் சோதனை மேற்கொண்டு வருகின்றனர். அவரது உறவினர்கள், நெருக்காமானவர்களுக்கு சொந்தமான இடங்களிலும் சோதனை நடைபெற்று வருகிறது.

ஆனால், இது அரசியல் பழிவாங்கும் நடவடிக்கை என்று அதிமுக குற்றம் சாட்டியுள்ளது. இந்தச் சோதனைக்கு எதிர்ப்பு தெரிவித்து ஜோலார்பேட்டையிலுள்ள வீரமணியின் வீட்டு முன்பு அதிமுக தொண்டர்கள் போராட்டத்தில் ஈடுபட்டனர். அப்போது, அவரது ஆதரவாளர்களுக்கும், போலீசாருக்கு இடையே தள்ளு-முள்ளு ஏற்பட்டது.

இந்த நிலையில், முன்னாள் அமைச்சர் கே.சி.வீரமணிக்கு சொந்தமான இடங்களில் நடைபெற்று வரும் சோதனை தொடர்பாக லஞ்ச ஒழிப்புத்துறை அதிகாரப்பூர்வ செய்தியை வெளியிட்டுள்ளது. இது தொடர்பாக வெளியிடப்பட்டுள்ள பத்திரிகை செய்தியில், கே.சி.வீரமணி பணிக்காலத்தில் வருமானத்துக்கு அதிகமாக சொத்து சேர்த்துள்ளது சம்பந்தமாக கடந்த 15ஆம் தேதியன்று வழக்குப்பதிவு செய்யப்பட்டு விசாரணையில் இருந்து வருவதாக தெரிவிக்கப்பட்டுள்ளது.

மேலும், “கே.சி.வீரமணி மற்றும் அவருக்கு தொடர்புடைய நபர்களுக்கு சொந்தமான 35 இடங்களில் சோதனை நடைபெற்றது. இந்த சோதனையின் போது ரூ.34 லட்சம் ரொக்கப்பணம், ரூ.1.80 லட்சம் மதிப்புள்ள வெளிநாட்டு கரன்சிகள், ஒரு ரோல்ஸ் ராய்ஸ் கார் உள்பட 9 சொகுசு கார்கள், 5 கம்ப்யூட்டர் ஹார்டு டிஸ்க்குகள், சொத்துகள் சம்பந்தப்பட்ட முக்கிய ஆவணங்கள், 623 சவரண் தங்க நகைகள், 47 கிராம் வைர நகைகள் 7.2 கிலோ வெள்ளி பொருட்கள், வங்கிக் கணக்கு புத்தகங்கள் உள்ளிட்டவைகள் கண்டறியப்பட்டு, வழக்கிற்கு தொடர்புடைய பணம் மற்றும் முக்கிய ஆவணங்கள் கைபற்றப்பட்டன. மேலும், கே.சி.வீரமணி வீட்டு வளாகத்தில் தோராயமாக ரூ.30 லட்சம் மதிப்புள்ள 275 யூனிட் மணல் குவித்து வைக்கப்பட்டிருந்தது கண்டறியப்பட்டது. விசாரணை தொடர்ந்து நடைபெற்று வருகிறது” என்றும் லஞ்ச ஒழிப்புத்துறை வெளியிட்டுள்ள செய்திக்குறிப்பில் தெரிவிக்கப்பட்டுள்ளது.