என்னது டாஸ்மாக் நஷ்டத்தில் இயங்கியதா? ஆர்.டி.ஐ.யில் அதிர்ச்சி தகவல்!

என்னது டாஸ்மாக் நஷ்டத்தில் இயங்கியதா? ஆர்.டி.ஐ.யில் அதிர்ச்சி தகவல்!

தமிழ்நாடு மாநில வாணிபக் கழகம் (Tamil Nadu State Marketing Corporation) தமிழகத்தில் மது வகைகளை வர்த்தகம் செய்யும் அரசு நிறுவனம். இந்நிறுவனம் தமிழகத்தில் மதுபானங்களை மொத்த மற்றும் சில்லறை வர்த்தகம் செய்ய ஏகபோக உரிமை பெற்றுள்ளது. தமிழக அரசின் வருவாய் ஈட்டும் முக்கிய காரணியாக டாஸ்மாக் செயல்பட்டு வருகிறது.

தமிழக அரசின் டாஸ்மாக் கடைகளில் தினமும் சராசரியாக ரூ.100 கோடி மதிப்பிலான சரக்கு வகைகள் விற்பனையாவதாக கூறப்படுகிறது. அதேபோல், பண்டிகை காலங்கள், வார விடுமுறை நாட்களில் டாஸ்மாக் கடைகளில் விற்பனை அதிகமாக நடைபெறுவது வழக்கம்.

கொரோனா தடுப்பு நடவடிக்கையாக தமிழகம் முழுவதும் டாஸ்மாக் கடைகள் சில காலம் மூடப்பட்டபோது தமிழக அரசுக்கு வருவாய் இழப்பு ஏற்பட்டது. தற்போது கொரோனா பரவல் காரணமாக காலை 10 மணி முதல் இரவு 8 மணி வரை டாஸ்மாக் கடைகள் செயல்பட்டு வருகிறது.

இந்த நிலையில், தமிழகத்தில் கடந்த 5 ஆண்டுகளாக டாஸ்மாக் நஷ்டத்தில் இயங்கியதாக தகவல் அறியும் உரிமைச் சட்டத்தின் மூலம் தெரிய வந்துள்ளது. சென்னையைச் சேர்ந்த காசிமாயன் என்பவர் டாஸ்மாக் விற்பனை பற்றி தகவல் அறியும் உரிமை சட்டத்தில் கேட்ட கேள்விக்கு, தமிழகத்தில் கடந்த 5 ஆண்டுகள் டாஸ்மாக் நஷ்டத்தில் இயங்கியதாக பதிலளிக்கப்பட்டுள்ளது.

அதாவது, 2010-11ஆம் ஆண்டில் ரூ.3.56 கோடியும், 2011-12ஆம் ஆண்டில் ரூ.1.12 கோடியும், 2012-13ஆம் ஆண்டில் ரூ.103.64 கோடியும், 2013-14ஆம் ஆண்டில் ரூ.64.44 கோடியும், 2019-20ஆம் ஆண்டில் ரூ.64.44 கோடியும் நஷ்டம் ஏற்பட்டுள்ளதாக தெரிவிக்கப்பட்டுள்ளது. இந்த தகவல் கடும் அதிர்ச்சியை ஏற்படுத்தியுள்ளது.

டாஸ்மாக் கடைகளில் விற்கப்படும் சரக்குகளின் விலை குவாட்டர் ஒன்றுக்கு ரூ.10 அதிகமாகவே விற்கப்படுகிறது. இதனை தடுக்க நடவடிக்கை எடுக்க வேண்டும் என்று மதுப்பிரியர்கள் எவ்வளவோ கோரிக்கைகள் விடுத்தாலும், நீதிமன்றம் உத்தரவிட்டாலும் கடைகளில் சட்டத்துக்கு புறம்பாகவே விற்பனை நடைபெறுகிறது. இந்த ஊழல் பணம் மேல்மட்ட அளவு வரை செல்வதாகவும் கூறப்படுகிறது. இதுபோன்று பணம் கொழிக்கும் டாஸ்மாக் கடைகளில் பல்வேறு முறைகேடுகள் நடைபெற்று வரும் நிலையில், நஷ்டத்தில் இயங்கியதாக வெறுமன கணக்கு காட்டியிருக்கக் கூடும் என்ற குற்றச்சாட்டுகள் முன்வைக்கப்படுகின்றன.