உள்ளாட்சித் தேர்தல்: முன்மாதிரியாக திகழும் திருமாவளவன்!

உள்ளாட்சித் தேர்தல்: முன்மாதிரியாக திகழும் திருமாவளவன்!

தமிழகத்தில் விடுபட்ட நெல்லை தென்காசி, காஞ்சிபுரம், செங்கல்பட்டு, விழுப்புரம், கள்ளக்குறிச்சி, வேலூர், திருப்பத்தூர், ராணிப்பேட்டை ஆகிய 9 மாவட்ட ஊரக உள்ளாட்சிகளுக்கு அக்டோபர் 6, 9 ஆகிய தேதிகளில் இரண்டு கட்டங்களாக தேர்தல் நடைபெறவுள்ளது. இதற்கான அறிவிப்பை அறிவிப்பை மாநில தேர்தல் ஆணையம் வெளியிட்டுள்ளது.

இதையடுத்து, கூட்டணி, விருப்பமனு வாங்குவது உள்ளிட்ட தேர்தலுக்கான பணிகளை அரசியல் கட்சிகள் மேற்கொண்டு வருகின்றன. வழக்கமாக, விருப்பமனு கொடுக்கும் தொண்டர்கள், நிர்வாகிகளிடம் இருந்து ரூ.2000 முதல் ரூ.5000 அல்லது அதற்கு மேல் கூட அரசியல் கட்சிகள் வசூலிக்கும்.

இந்த நிலையில், “விடுதலைச் சிறுத்தைகள் கட்சியின் சார்பில் உள்ளாட்சித் தேர்தலில் போட்டியிட விரும்பும் தோழர்கள் அந்தந்த மாவட்டத்திற்கு நியமிக்கப்பட்டுள்ள மேலிடப் பொறுப்பாளர்களிடம் விருப்ப மனுவை அளிக்க வேண்டும். விருப்ப மனுவுக்கு கட்டணம் ஏதும் கிடையாது” என்று விடுதலை சிறுத்தகள் கட்சி தெரிவித்துள்ளது. இதற்கான அறிவிப்பை அக்கட்சியின் தலைவர் திருமாவளவன் தனது ட்விட்டர் பக்கத்தில் பதிவிட்டுள்ளார்.மேலும், விருப்ப மனுவை அளிக்கும் மேலிடப் பொறுப்பாளர்களின் பெயர்கள் அடங்கிய பட்டியலையும் பகுதி வாரியாக அவர் வெளியிட்டுள்ளார். முன்னதாக, ஊரக உள்ளாட்சித் தேர்தலில் திமுகவுடனான கூட்டணி தொடரும் என்றும் விசிக தலைவர் திருமாவளவன் அறிவித்திருந்தார் என்பது குறிப்பிடத்தக்கது.