சசிகலா அண்ணன் மகன் சுதாகரன் சொத்துகள் முடக்கம்!

சசிகலா அண்ணன் மகன் சுதாகரன் சொத்துகள் முடக்கம்!

சிறுதாவூர் பங்களா வளாகத்தில் உள்ள வி.என். சுதாகரனுக்கு சொந்தமான 21 ஏக்கர் நிலத்தை பினாமி தடுப்புச் சட்டத்தின் கீழ் வருமான வரித் துறையினர் முடக்கி அதிரடி நடவடிக்கை எடுத்துள்ளனர்.

மறைந்த முன்னாள் முதலமைச்சர் ஜெயலலிதாவின் தோழி சசிகலா, இளவரசி, சுதாகரனுக்கு சொந்தமான சென்னை, காஞ்சிபுரம் உள்ளிட்ட 7 இடங்களில் உள்ள சொத்துகள் பினாமி தடுப்புச் சட்டத்தின் கீழ் வருமான வரித்துறையினரால் முடக்கப்பட்டு உள்ளன.

கடந்த 8 ஆம் தேதி சசிகலா மற்றும் இளவரசிக்கு சொந்தமான பையனூர் பங்களா மற்றும் தோட்டம் ஆகியவை முடக்கப்பட்டன. இந்நிலையில் இன்று, சிறுதாவூர் பங்களாவில் உள்ள சுதாகரனுக்கு சொந்தமான 21 ஏக்கர் நிலமும் பினாமி தடுப்புச் சட்டத்தின் கீழ் வருமான வரித் துறையினரால் முடக்கப்பட்டு உள்ளது. இந்த நிலத்தின் மதிப்பு, 30 கோடி ரூபாய் என மதிப்பிடப்பட்டு உள்ளது. மறைந்த முன்னாள் முதல்வர் ஜெயலலிதா, சுதாகரனை தனது வளர்ப்பு மகனாக அறிவித்து மிக ஆடம்பரமாக அவருக்குத் திருமணமும் நடத்தி வைத்தார் என்பது குறிப்பிடத்தக்கது.

சொத்துக் குவிப்பு வழக்கில், நான்கு ஆண்டுகள் சிறைத் தண்டனைக்குப் பிறகு, இந்த ஆண்டு தொடக்கத்தில், பெங்களூரு பரப்பன அக்ரஹாரா சிறையில் இருந்து, சசிகலா, இளவரசி, சுதாகரன் ஆகியோர் விடுதலை ஆனது குறிப்பிடத்தக்கது.