பாக்கத்தானே போறீங்க இந்த காளியோட ஆட்டத்த: சைலேந்திர பாபு சொன்ன மேட்டர்!

பாக்கத்தானே போறீங்க இந்த காளியோட ஆட்டத்த: சைலேந்திர பாபு சொன்ன மேட்டர்

தமிழ்நாட்டின் சட்டம்- ஒழுங்கு பிரிவு டிஜிபியாக பதவி வகித்து வந்த ஜே.கே.திரிபாதியின் பதவிக் காலம், இன்றுடன் நிறைவடைந்தது. இதையடுத்து, புதிய டிஜிபியாக சைலேந்திர பாபு இன்று பதவியேற்றுக் கொண்டார். அவரிடம் முறைப்படி பொறுப்புகளை ஒப்படைத்தார் ஜே.கே.திரிபாதி.

சைலேந்திர பாபுவை பொறுத்தவரை அவரைப் பற்றி யாருக்கும் சொல்லித் தெரிய வேண்டியதில்லை. தனது உடல் நலத்தை எப்படி பேணிக் கப்பாரோ அதேபோல், பொதுமக்களும் இருக்க வேண்டும் என்பதற்காக பல்வேறு விழிப்புணர்வு வீடியோக்களை வெளியிட்டு வருபவர். ஐபிஎஸ் ஆகும் கனவோடு இருக்கும் இளைஞர்களின் ரோல் மாடலாக தனது 25 வயதிலேயே ஐபிஎஸ் ஆன சைலேந்திர பாபு திகழ்பவர்.

மற்றவர்களுக்கு உதவ வேண்டும் என்ற எண்ணமும், பொதுமக்களிடம் கன்னியமாக நடந்து கொள்ளும் பாங்குடைய சைலேந்திர பாபு, அதேநேரத்தில் ரவுடிகளுக்கு சிம்ம சொப்பனமாக இருப்பவர். சட்டம்- ஒழுங்கு பிரிவில் பல மாவட்டங்களில் பணியாற்றி இருக்கும் சைலேந்திரபாபு தனது பணியில் தனித்துவமான முத்திரைகளை பதித்தவர்.

வேகம், விவேகம் என்று கம்பீரமாக காட்சியளித்தாலும், காக்கி உடை அணிந்த காவல் அதிகாரிகள் என்றாலே கரடு முரடானவர்கள் என்ற பிம்பத்தை உடைத்த சைலேந்திர பாபு, தமிழ்நாட்டின் காவல்துறை தலைவராக பொறுப்பேற்றுள்ளதை பொதுமக்கள் பலரும் வரவேற்று வாழ்த்து தெரிவித்து வருகின்றனர்.

இந்த நிலையில், தமிழ்நாட்டின் புதிய டிஜிபியாக பொறுப்பேற்றுக் கொண்ட சைலேந்திர பாபு, “இந்த அரிய பொறுப்பை எனக்கு அளித்த முதல்வர் மு.க.ஸ்டாலினுக்கு நன்றி. தமிழகத்தில் குற்ற செயல்களை தடுக்க முன்னுரிமை அளித்து செயல்படுவேன். முதலமைச்சர் தனிப்பிரிவில் அளிக்கப்படும் புகார்களுக்கு 30 நாட்களில் தீர்வு காணப்படும். நீங்களே பாருங்க, எங்க செயல்பாடு பேசும்” என்று தெரிவித்துள்ளார். அவரது செயல்பாடுகள் சிறக்க வாழ்த்துகள்.