திட்டமிட்டபடி செப்., 12ல் நீட் தேர்வு - முதன்முறையாக 13 மொழிகளில் நடைபெறுகிறது!
இளங்கலை மருத்துவப் படிப்புகளுக்கான நீட் தேர்வு, 13 மொழிகளில் நடைபெறும் என, மத்திய கல்வி அமைச்சர் தர்மேந்திர பிரதான் அறிவித்துள்ளார்.
நாடு முழுவதும் கொரோனா தடுப்பு நடவடிக்கைகளை பின்பற்றி, வரும் செப்டம்பர் மாதம் 12-ம் தேதி இளங்கலை மருத்துவப் படிப்புகளுக்கான நீட் நுழைவுத் தேர்வு நடைபெறும் என, மத்திய கல்வித் துறை அமைச்சர் தர்மேந்திர பிரதான் நேற்று அறிவித்திருத்தார். இதன்படி, இன்று மாலை 5 மணி முதல், நீட் தேர்வு விண்ணப்பிக்கும் முறை ஆன்லைனில் தொடங்கியது.
இந்நிலையில், சமூக வலைதளமான ட்விட்டரில், பா.ஜ.க.,வைச் சேர்ந்த மத்திய கல்வித் துறை அமைச்சர் தர்மேந்திர பிரதான் வெளியிட்டுள்ள பதிவில் தெரிவித்துள்ளதாவது:
நீட் தேர்வு எழுதும் மாணவர்கள், தேசிய தேர்வு முகமை இணையதளத்தில் விண்ணப்பிக்கலாம். கடந்த ஆண்டு 155 நகரங்களில் தேர்வு நடைபெற்ற நிலையில், கொரோனா பரவலை தடுக்கும் வகையில் நடப்பாண்டில் 198 நகரங்களில் நீட் தேர்வு நடத்தப்பட உள்ளதுநீட் தேர்வு மையங்களின் எண்ணிக்கை இந்த ஆண்டு அதிகரிக்கப்படும். கொரோனா வழிகாட்டு நெறிமுறைகளை பின்பற்றி தேர்வு நடத்தப்படும். மத்திய கிழக்கு நாடுகளில் உள்ள இந்திய மாணவர்களுக்காக, குவைத்தில், ஒரு நீட் தேர்வு மையம் ஏற்பாடு செய்யப்பட்டுள்ளது.
கடந்த காலங்களில் நீட் தேர்வு, ஆங்கிலம், இந்தி, தமிழ், தெலுங்கு, மராத்தி, உருது, குஜராத்தி உள்ளிட்ட 11 மொழிகளில் நடத்தப்பட்ட நிலையில், தற்போது பஞ்சாபி மற்றும் மலையாளம் ஆகிய இரு மொழிகள் கூடுதலாக சேர்க்கப்பட்டு, முதன்முறையாக, 13 மொழிகளில் நீட் தேர்வு நடத்தப்பட உள்ளது.
இவ்வாறு அவர் தெரிவித்துள்ளார்.
இதற்கிடையே, முதுகலை மருத்துவப் படிப்புகளுக்கான நீட் தேர்வு, செப்டம்பர் மாதம் 11-ம் தேதி நடைபெறும் என அறிவிக்கப்பட்டிருப்பது குறிப்பிடத்தக்கது.
No comments:
Post a Comment