தமிழக சட்டமன்றத்தில் 150 பாஜக எம்.எல்.ஏ.க்கள்: அண்ணாமலை ஆருடம்!
தமிழக பாஜக தலைவராக இருந்த எல்.முருகன், மத்திய இணை அமைச்சராக பொறுப்பேற்றதை தொடர்ந்து தமிழக பாஜக புதிய தலைவராக, அக்கட்சியின் துணைத் தலைவராக இருந்த அண்ணாமலை நியமிக்கப்பட்டுள்ளார்.
புதிய தலைவராக நியமிக்கப்பட்டதையடுத்து, சென்னை தி.நகரில் உள்ள கட்சி அலுவலகமான கமலாலயத்தில், வருகிற 16ஆம் தேதி அவர் பொறுப்பேற்றுக் கொள்ளவுள்ளார். இதையொட்டி கோவையில் இருந்து சென்னைக்கு சாலை மார்க்கமாக அண்ணாமலை வந்து கொண்டிருக்கிறார். வழிநெடுகிலும் அவருக்கு சிறப்பான வரவேற்பை கட்சி நிர்வாகிகள் அளித்து வருகின்றனர்.
இந்த நிலையில், ஈரோடு குமலன்குட்டை பகுதியில் தொண்டர்கள் மத்தியில் பேசிய அண்ணாமலை, தமிழகத்தில் பாஜக ஆட்சி அமைக்க வேண்டும் என்பதே பிரதமர் மோடியின் விருப்பம். நான்கு சட்டமன்ற உறுப்பினர்கள் இருப்பதால், வருங்காலம் தமிழகத்தில் பாரதிய ஜனதா கட்சியின் காலமாக அமையும். 2026 தமிழக சட்டமன்ற தேர்தலில் பாஜகவை சேர்ந்த 150 எம்எல்ஏக்கள் சட்டமன்றத்துக்குள் நுழைவார்கள் என்றார்.
மக்களுக்கு சேவை செய்வதற்காகவே கட்சியில் எனக்கு பதவி வழங்கப்பட்டதாக தெரிவித்த அண்ணாமலை, கட்சியின் கொள்கையை புரிந்து கொள்ளக்கூடியவர்கள் அதிகளவு இருப்பதால் கட்சியின் மிகப்பெரிய வளர்ச்சி இங்கு இருக்கும். அனைவரையும் ஒன்றிணைத்து ஒரு குழுவாக செயல்படுவதுதான் என்னுடைய முதல் வேலையாக இருக்கும் என்றும் தெரிவித்தார்.
முன்னதாக, கொங்கு நாடு விவகாரத்தில் அதற்கு ஆதவரான கருத்துகளை பாஜகவினர் தெரிவித்து வரும் நிலையில், முதலில் அத்தைக்கு மீசை முளைக்கட்டும். மற்ற விஷயங்களைப் பிறகு பார்க்கலாம் என்று முன்னாள் அமைச்சர் ஜெயக்குமார் சாடியிருந்தார் என்பது குறிப்பிடத்தக்கது.
No comments:
Post a Comment