நீட் ரத்து: ஒன்றிய அமைச்சரிடம் வலியுறுத்திய மா.சு

நீட் ரத்து: ஒன்றிய அமைச்சரிடம் வலியுறுத்திய மா.சு

தமிழ்நாடு சுகாதாரத் துறை அமைச்சர் மா. சுப்ரமணியன், இன்று டெல்லி சென்றார். ஒன்றிய சுகாதாரத் துறை அமைச்சர் மன்சுக் மாண்டவியாவை சந்தித்த அவர் பல்வேறு முக்கிய கோரிக்கைகள் அடங்கிய மனுவை அளித்தார்.

இந்தப் பயணம் குறித்து நேற்று செய்தியாளர்களைச் சந்தித்த போதே,

 “தடுப்பூசியை அதிகப்படுத்தி வழங்க வேண்டும், எச்.எல்.எல் தடுப்பூசி மையத்தை (செங்கல்பட்டு தடுப்பூசி மையம்) உடனடியாக திறக்க வேண்டும். இதனால் இப்போதுள்ள தடுப்பூசி தட்டுப்பாட்டை போக்க அது உதவியாக இருக்கும் என்கிற அடிப்படையில் வலியுறுத்துவோம். மொத்தம் 13 கோரிக்கைகளை வைக்க உள்ளோம். எய்ம்ஸ் மருத்துவக் கல்லூரி திறப்பு மற்றும் நீட் தேர்விலிருந்து தமிழகத்துக்கு விலக்கு அளிக்க வேண்டிய அவசியத்தையும் எடுத்துச் சொல்ல உள்ளோம்” என்று கூறினார்.

“நீட் விவகாரம் குறித்து பரிசீலிப்பதாக ஒன்றிய அமைச்சர் மன்சுக் மாண்டவியா கூறினார். மேலும் பாடப்பிரிவு வித்தியாசம், ஏ.கே.ராஜன் குழு பரிந்துரைகளை ஒன்றிய அமைச்சரிடம் விளக்கினேன்” என அவர் தெரிவித்துள்ளார்.

மா.சுப்பிரமணியன் ஏற்கெனவே ஒன்றிய சுகாதாரத் துறை அமைச்சரை சந்திக்க நேரம் கேட்டிருந்தார். அமைச்சரவை விரிவாக்கத்தில் ஹர்ஷவர்தன் பதவி விலகியதால் புதிய ஒன்றிய அமைச்சராக மன்சுக் மாண்டவியா பதவியேற்றார். இதனால் சில நாள்கள் கழித்து இன்று சென்று சந்தித்துள்ளார்.