ரோல்ஸ் ராய்ஸ் கார் வழக்கு: நடிகர் விஜய் மேல்முறையீடு

ரோல்ஸ் ராய்ஸ் கார் வழக்கு: நடிகர் விஜய் மேல்முறையீடு

ரோல்ஸ் ராய்ஸ் காருக்கு நுழைவு வரியில் இருந்து விலக்களிக்க கோரிய வழக்கில், தனி நீதிபதியின் உத்தரவை எதிர்த்து, நடிகர் விஜய் மேல் முறையீடு செய்துள்ளார்.

கடந்த 2012ம் ஆண்டு, ஐரோப்பிய நாடான பிரிட்டனில் இருந்து, ரோல்ஸ் ராய்ஸ் சொகுசு காரை பிரபல நடிகர் விஜய் இறக்குமதி செய்தார். இந்த சொகுசு காருக்கு வணிக வரித் துறை நுழைவு வரி விதித்தது. இதை எதிர்த்தும், வரி விதிக்கத் தடை கோரியும், நடிகர் விஜய் தரப்பில் சென்னை உயர்நீதிமன்றத்தில் வழக்கு தொடரப்பட்டது.

இந்த வழக்கை விசாரித்த சென்னை உயர் நீதிமன்ற நீதிபதி எஸ்.எம்.சுப்ரமணியம், நடிகர்கள் நிஜ வாழ்விலும் ரீல் ஹீரோக்களாக இருக்கக் கூடாது; வரி செலுத்துவது நன்கொடை போன்றது அல்ல, நாட்டிற்கு குடிமகன்கள் செய்ய வேண்டிய கட்டாய பங்களிப்பு; சமூக நீதிக்கு பாடுபடுவதாக கூறிக் கொள்ளும் நடிகர்கள் வரி ஏய்ப்பு செய்வதை ஏற்றுக் கொள்ள முடியாது என கண்டனம் தெரிவித்தார். இந்த வழக்கை தள்ளுபடி செய்த அவர், நடிகர் விஜய்க்கு 1 லட்சம் ரூபாய் அபராதமும் விதித்தார்.

இந்நிலையில், வெளிநாட்டு சொகுசு காருக்கு நுழைவு வரி வசூலிக்கத் தடை கோரிய வழக்கில், தனி நீதிபதியின் உத்தரவை எதிர்த்து, சென்னை உயர் நீதிமன்றத்தில், நடிகர் விஜய் தரப்பில், மேல் முறையீடு மனுத் தாக்கல் செய்யப்பட்டுள்ளது.

தனி நீதிபதி எஸ்.எம்.சுப்ரமணியம் பிறப்பித்த தீர்ப்பின் நகல் இல்லாமல் மேல் முறையீட்டு மனுவை விசாரணைக்கு பட்டியலிடக் கோரியும் நடிகர் விஜய் தரப்பில் மனு தாக்கல் செய்யப்பட்டுள்ளது. மேல் முறையீட்டு மனு, நீதிபதிகள் சுந்தரேஷ், மஞ்சுளா அமர்வில் வரும் 19-ம் தேதி திங்கட்கிழமை விசாரணைக்கு பட்டியலிடப்பட்டு உள்ளது.

தனி நீதிபதி எஸ்.எம்.சுப்ரமணியம் பிறப்பித்த தீர்ப்பில், தன்னை பற்றி குறிப்பிட்டுள்ள விமர்சனங்களை நீக்கவும், நடிகர் விஜய் கோரிக்கை வைத்திருப்பதாகவும் தகவல் வெளியாகி உள்ளது.