அரசுப் பேருந்து கட்டணம் உயருமா? அமைச்சர் சொன்ன தகவல்!

அரசுப் பேருந்து கட்டணம் உயருமா? அமைச்சர் சொன்ன தகவல்!

பெட்ரோல் டீசல் விலை வரலாறு காணாத அளவு மிக வேகமாக உயர்ந்து வருகிறது. இதனால் ஒட்டுமொத்தமாக விலைவாசி உயர்வு ஏற்பட்டுள்ளது.

டீசல் விலை உயர்வு ஒரு பக்கம் வாட்டும் நிலையில் 50 சதவீதம் பயணிகளுடன் மட்டுமே பேருந்துகளை இயக்க வேண்டும் என தமிழ்நாடு அரசு அறிவித்ததால்

தனியார் பேருந்து உரிமையாளர்கள் பேருந்துகளை இயக்க தயக்கம் காட்டுகின்றனர். இந்நிலையில் அரசுப் பேருந்துகளே பெருமளவில் இயங்கி வருகின்றன.

திருவள்ளூர் மாவட்டத்தில், கும்மிடிப்பூண்டியில் உள்ள சாலை போக்குவரத்து நிறுவன பயிற்சி மையம் மற்றும் குடிநீர் சுத்திகரிப்பு நிலையத்தை போக்குவரத்துத் துறை அமைச்சர் ஆர்.எஸ். ராஜகண்ணப்பன் ஆய்வு செய்தார்.

அதன்பின் செய்தியாளர்களைச் சந்தித்த அவர், "தமிழக முதல்வர் மு.க.ஸ்டாலின் உத்தரவின் பேரில், அரசு பேருந்துகளில் பெண்கள் கட்டணமில்லாமல் பயணம் செய்யும் நடைமுறை அமலுக்கு வந்ததால் பேருந்துகளில் செல்லும் பெண்களின் எண்ணிக்கை 40 சதவீதத்தில் இருந்து 60 சதவீதமாக உயர்ந்துள்ளது. இதனால் சாதாரண கட்டண பேருந்துகளின் எண்ணிக்கை சுமார் 6 ஆயிரத்தில் இருந்து 7,291 ஆக உயர்த்தப்பட்டுள்ளது.

கொரோனா நோய்த்தொற்று காரணமாக, அரசு போக்குவரத்து கழகங்களில் உள்ள 19 ஆயிரத்து 700 பேருந்துகளில், தற்போது 15 ஆயிரத்து 627 பேருந்துகள் கட்டம் கட்டமாக இயக்கப்படுகின்றன. அரசாங்கத்தின் அறிவுறைப்படி, குளிர்சாதன வசதி இல்லாமல் அரசு விரைவு போக்குவரத்துக்கழக பஸ்கள் இயக்கப்பட்டு வருகின்றன. மாநகர் போக்குவரத்து கழகத்தின் சார்பில் 2 ஆயிரத்து 650 பேருந்துகள் இயக்கப்படுகின்றன. பெண்களின் பாதுகாப்பை உறுதி செய்ய, மத்திய அரசின் நிர்பயா திட்டத்தின் கீழ், மாநகர் போக்குவரத்துக்கழகத்தை சேர்ந்த 2,800 பஸ்களில் கண்காணிப்பு கேமராக்கள் பொருத்தும் பணி நடைபெற்று வருகிறது. விரைவில் அனைத்து டவுன் பஸ்களிலும் கேமராக்கள் பொருத்தப்படும்” என்று கூறினார்.