சொந்த உழைப்பால் உயர்ந்தவர்! - நடிகர் விஜய்க்கு ஆதரவாக ஓ.பி.எஸ்., மகன் வாய்ஸ்!
வரி விலக்கு வழக்கில், நடிகர் விஜய்க்கு, அ.தி.மு.க., ஒருங்கிணைப்பாளர் ஓ.பன்னீர்செல்வத்தின் மகன் ஜெயபிரதீப் ஆதரவு தெரிவித்துள்ளார்.
வெளிநாட்டு சொகுசு காருக்கு வரி விதிக்க தடை கோரிய வழக்கில், நடிகர் விஜய்க்கு, 1 லட்சம் ரூபாய் அபராதம் விதித்து சென்னை உயர்நீதிமன்றம் உத்தரவிட்டது. சமூக நீதிக்கு பாடுபடுவதாக பிரதிபலிக்கும் நடிகர்கள், இது போன்ற வரி ஏய்ப்பு செய்வது ஏற்றுக் கொள்ள இயலாது என்றும், வரி ஏய்ப்பு என்பது தேசத் துரோகம் எனவும் நீதிமன்றம் தெரிவித்தது. இறக்குமதி செய்யப்பட்ட ரோல்ஸ் ராய்ஸ் காருக்கான வரியை இரண்டு வாரங்களில் செலுத்த வேண்டும் என நடிகர் விஜய்க்கு உத்தரவிட்டு மனுவை உயர்நீதிமன்றம் தள்ளுபடி செய்தது.
இதன் காரணமாக, நடிகர் விஜய் மீது விமர்சனங்கள் எழத் தொடங்கி உள்ள நிலையில், அவரது ரசிகர்கள் அவருக்கு ஆதரவாக சமூக வலைதளங்களில் கருத்துத் தெரிவித்து வருகின்றனர். இந்நிலையில், அ.தி.முக ஒருங்கிணைப்பாளர் ஓ.பன்னீர்செல்வத்தின் மகன் ஜெயபிரதீப் நடிகர் விஜய்க்கு ஆதரவாக கருத்து தெரிவித்துள்ளார்.
இது தொடர்பாக, சமூக வலைதளமான ட்விட்டரில், ஜெயபிரதீப் வெளியிட்டுள்ள பதிவில் கூறியுள்ளதாவது:
நடிகர் விஜய் தனது ரோல்ஸ் ராய்ஸ் காருக்கு வரிவிலக்கு கோரியதற்கு சென்னை உயர்நீதிமன்றம் 1 லட்சம் ரூபாய் அபராதம் விதித்திருப்பது தற்போது பேசு பொருளாக மாறியுள்ளது. சினிமா துறையில் தனது சொந்த உழைப்பால் உயர்ந்து, தான் வாங்கும் ஊதியத்திற்கு முறையாக வருமான வரியாக கோடிக் கணக்கான பணத்தை அரசிற்கு செலுத்தி வருபவர் நடிகர் விஜய்.
அந்த பணம் பல ஏழை மக்களின் வாழ்வாதாரத்திற்கு உதவிகரமாக இருந்துள்ளது. எப்போதும் ஒரு மனிதரின் நிறைகளை குறைவாக பேசுவதும், சிறுசிறு குறைகளை மிகைப்படுத்தி பேசுவதும் மனித இயல்பாக இருக்கிறது.
மேலும் இறக்குமதி செய்த வாகனங்களுக்கு வரிவிலக்கு கேட்பது அவரவரின் உரிமை சார்ந்தது. இந்த உரிமை நடிகர் விஜய்க்கும் உண்டு. சினிமா பிரபலம் என்றால் அவருக்கு பொருந்தாது என்றாகாது. இதே போல், 2012ம் ஆண்டு வரிவிலக்கு கேட்டு, கிரிக்கெட் ஜாம்பவான் சச்சின் டெண்டுல்கர் உள்பட பலரும் கோரிக்கை வைத்தார்கள். இதில் சச்சின் டெண்டுல்கருக்கு சட்டத்திருத்தம் கொண்டு வந்து மத்திய அரசு 1.13 கோடி ரூபாய் வரி விலக்கு அளித்தது என்பது குறிப்பிடத்தக்கது.
No comments:
Post a Comment