திருப்பதிக்கு இணையாக தமிழ்நாடு கோயில்கள்: அமைச்சர் சொன்ன தகவல்!

திருப்பதிக்கு இணையாக தமிழ்நாடு கோயில்கள்: அமைச்சர் சொன்ன தகவல்!

ஸ்டாலின் அமைச்சரவையில் சேகர் பாபுவுக்கு இந்து சமய அறநிலையத்துறை ஒதுக்கப்பட்டுள்ளது. தனது கடுமையான களப்பணிகளுக்கும், தொகுதி மக்களுடனான ஓட்டத்துக்கும் அறியப்பட்ட சேகர் பாபுவின் மீது வைத்த நம்பிக்கையின் காரணமாக அவருக்கு இந்தத் துறையை ஸ்டாலின் ஒதுக்கியதாக கூறப்பட்டது.

அதற்கு ஏற்றவகையில், கோயில் சொத்துகளின் விவரங்கள் திரட்டப்பட்டு அதை இணையதளத்தில் வெளியிடுவது, கோயில் நில ஆக்கிரமிப்புகளை மீட்பது, ஆகம பயிற்சி பெற்ற அனைவரும் அர்ச்சகர் பணியில் அமர்த்த நடவடிக்கை, கொரோனா காலத்தில் கோயில்களில் தயாரிக்கப்படும் உணவுகளை மருத்துவமனைகளுக்கு அளிப்பது என சேகர் பாபுவின் நடவடிக்கைகள் பாராட்டுகளை பெற்று வருகிறது.

இந்த நிலையில், சென்னை வேளச்சேரியில் ஆக்கிரமிப்பால் சூழப்பட்டுள்ள வாசுதேவ பெருமாள் கோயிலில் அமைச்சர் சேகர் பாபு ஆய்வு மேற்கொண்டார். அதன்பின்னர் செய்தியாளர்களிடம் பேசிய அவர், தமிழ்நாட்டில் உள்ள முக்கிய கோயில்களை திருப்பதிக்கு இணையாக மாற்ற வருகிற 17ஆம் தேதி இந்து அறநிலையத்துறை சார்பில் சிறப்பு கூட்டம் நடைபெறவுள்ளதாக தெரிவித்தார்.

கோயில்களின் வரவு - செலவு கணக்குகள் விரைவில் இணையத்தில் வெளியிடப்படும் என்று தெரிவித்த சேகர் பாபு, அறநிலையத்துறை இணையதளத்தில் 10 ஆயிரத்திற்கும் மேற்பட்ட கோரிக்கைகளும், மனுக்களாக 30 ஆயிரத்திற்கும் மேற்பட்ட கோரிக்கைகளும் வந்துள்ளதாகவும் தெரிவித்தார். இதன் மீது விரைவில் நடவடிக்கை எடுக்கப்படும் என்றும் அவர் தெரிவித்தார்.