நீட் தேர்வுக்கு விலக்கு? நாளை டெல்லி செல்கிறார் அமைச்சர் மா.சுப்ரமணியன்!

நீட் தேர்வுக்கு விலக்கு? நாளை டெல்லி செல்கிறார் அமைச்சர் மா.சுப்ரமணியன்!

தமிழக சுகாதாரத் துறை அமைச்சர் மா. சுப்ரமணியன், நாளை டெல்லிக்கு செல்கிறார். மத்திய சுகாதாரத் துறை அமைச்சர் மன்சுக் மாண்டவியாவை சந்திக்கும் அவர், பல்வேறு முக்கிய கோரிக்கைகள் அடங்கிய மனுவை அளிக்க உள்ளார்.

சென்னை தேனாம்பேட்டையில் உள்ள தேசிய நல்வாழ்வு மைய கூட்டரங்கில், தமிழக சுகாதாரத் துறை அமைச்சர் மா.சுப்பிரமணியன் செய்தியாளர்களுக்கு அளித்த பேட்டி:

தமிழகத்தில் கொரோனா காலத்தில் ஆக்சிஜன் பெருமளவில் தேவைப்பட்டது. இந்த தேவையை பூர்த்தி செய்யும் வகையில் தன்னார்வ அமைப்புகள் உள்ளிட்ட அனைவரும் உதவ வேண்டும் என்று முதல்வர் கோரிக்கை வைத்திருந்தார். அதன்படி பல்வேறு அமைப்புகள் ஆக்சிஜன் செறிவூட்டிகளை வழங்கி வருகின்றனர்.

சென்னையில் டெங்கு பாதித்தவர்கள் நலமுடன் உள்ளனர். டெங்குவை கட்டுப்படுத்த தேவையான நடவடிக்கைகளை சுகாதாரத் துறை எடுத்து வருகிறது. நீட் தேர்வு தொடர்பாக, நீதிபதி ஏ.கே.ராஜன் குழுவினர் 86 ஆயிரம் பேரின் கருத்துக்களை கேட்டறிந்து முதல்வரிடம் அறிக்கை சமர்ப்பித்துள்ளனர். எனவே இது தொடர்பாக சட்ட வல்லுனர்களிடம் கலந்தாலோசித்து முதல்வர் அறிவிப்பு வெளியிடுவார்.

கொரோனா இறப்பு குறித்து மறைக்க வேண்டிய அவசியம் அரசுக்கு கிடையாது. அதேபோல் ஊரடங்கு தளர்வுகள் அளிக்கும் போது, அரசியல் கட்சிகளும் அதனை கவனத்தில் கொண்டு செயல்பட வேண்டும். ஏற்கனவே கடந்த தேர்தலின் போது, கொரோனா இரண்டாவது அலை அதிகமாக பரவியதற்கு அரசியல் கட்சிகள் காரணம் என்ற குற்றச்சாட்டு உள்ளது. எனவே அதை கருத்தில் கொண்டு மூன்றாவது அலைக்கு வழிவகுக்கும் வகையில் அரசியல் கட்சிகள் செயல்படக் கூடாது.

வணிக வளாகங்கள், வணிக நிறுவனங்களில் விதியை மீறி கூடுதல் குளிர்சாதன வசதியை பயன்படுத்துதல் மற்றும் சமூக இடைவெளி உள்ளிட்ட கொரோனா விதிமுறைகளை பின்பற்றாதவர்கள் மீது மாவட்ட நிர்வாகம், மாநகராட்சி மூலமாக தீவிர நடவடிக்கைகள் எடுக்கப்படும்.

இவை அனைத்துமே மூன்றாம் அலை நுழையாமல் எடுக்கப்படும் நடவடிக்கையே; பொதுமக்கள் இதற்கு ஒத்துழைப்பு அளிக்க வேண்டும். கொரோனா இன்னும் முடியவில்லை. விதிமுறைகளை பின்பற்றாதோர் மீது கடும் நடவடிக்கை எடுக்கப்படும்.நாளை மதியம் டெல்லி செல்கிறேன். அங்கு மத்திய சுகாதாரத் துறை அமைச்சர் மன்சுக் மாண்டவியாவை சந்திக்க உள்ளேன். அப்போது, தடுப்பூசியை அதிகப்படுத்தி வழங்க வேண்டும், எச்.எல்.எல் தடுப்பூசி மையத்தை (செங்கல்பட்டு தடுப்பூசி மையம்) உடனடியாக திறக்க வேண்டும்.

இதனால் இப்போதுள்ள தடுப்பூசி தட்டுப்பாட்டை போக்க அது உதவியாக இருக்கும் என்கிற அடிப்படையில் வலியுறுத்துவோம். மொத்தம் 13 கோரிக்கைகளை வைக்க உள்ளோம். எய்ம்ஸ் மருத்துவக் கல்லூரி திறப்பு மற்றும் நீட் தேர்விலிருந்து தமிழகத்துக்கு விலக்கு அளிக்க வேண்டிய அவசியத்தையும் எடுத்துச் சொல்ல உள்ளோம்.

இவ்வாறு அவர் தெரிவித்தார்.