ராஜ்யசபா தேர்தல்: திமுக வேட்பாளர் எம்.எம்.அப்துல்லா வேட்பு மனுதாக்கல்!
மாநிலங்களவையில் தமிழகத்துக்கு மூன்று இடங்கள் காலியாக உள்ளன. ஆனால், கொரோனா நோய்த்தொற்று காரணமாக மாநிலங்களவை தேர்தல் நடத்தப்படாமல் இருந்தது. தமிழகத்தில் காலியாக
இருக்கக்கூடிய இடங்களில் ராஜ்யசபா தேர்தலை உடனடியாக நடத்தக் கோரி திமுக சார்பில் தேர்தல் ஆணையத்திடம் கோரிக்கை வைக்கப்பட்டது.
இதையடுத்து, முதல்கட்டமாக செப்டம்பர் 13ஆம் தேதி ஒரேயொரு காலி இடத்திற்கு மட்டும் தேர்தல் நடைபெறவுள்ளது. அதிமுகவின் முகமது ஜானின் மறைவை தொடர்ந்து அந்த இடத்துக்கான இடைத்தேர்தல் தேதி மட்டுமே அறிவிக்கப்பட்டது. மூன்று இடங்களுக்கும் தனித்தனியாக தேர்தல் நடைபெறுவதால் 3 இடங்களையும் திமுகவே கைப்பற்றும் என தெரிகிறது.
தேர்தல் தேதி அறிவிக்கப்பட்டதன் தொடர்ச்சியாக, திமுகவின் வெளிநாடு வாழ்
இந்தியர் நலப்பிரிவின் இணைச் செயலாளராக இருக்கும் புதுக்கோட்டையை சேர்ந்த
எம்.எம்.அப்துல்லா மாநிலங்களவை தேர்தலுக்கான திமுக வேட்பாளராக அறிவிக்கப்பட்டார்.
இந்த நிலையில், தமிழகத்தில் காலியாக உள்ள ராஜ்யசபா தேர்தலுக்காக திமுக வேட்பாளர் எம்.எம்.அப்துல்லா முதல்வரும், திமுக தலைவருமான ஸ்டாலின் முன்னிலையில் சட்டப்பேரவை செயலாளர் சீனிவாசனிடம் மனு தாக்கல் செய்தார். இந்த நிகழ்வின் போது, டி.ஆர்.பாலு தயாநிதி மாறன் திருச்சி சிவா உள்ளிட்ட திமுக எம்.பி.க்கள் உடனிருந்தனர்.
No comments:
Post a Comment