அமெரிக்காவுக்கு தலிபான்கள் எச்சரிக்கை!

அமெரிக்காவுக்கு தலிபான்கள் எச்சரிக்கை!

ஆப்கனில் இருந்து அமெரிக்க படைகள் வெளியேறுவதாக அறிவித்ததையடுத்து, தலிபான்களின் ஆதிக்கம் அதிகரித்து வந்தது. அந்நாட்டின் ஒவ்வொரு பகுதியாக கைபற்றி வந்த அவர்கள் கடைசியாக தலைநகர் காபூலையும் கைபற்றினர். அதிபர் மாளிகையை அவர்கள் கைபற்றியதையடுத்து, முன்னாள் அதிபர் அஷ்ரப் கானி நாட்டை விட்டு வெளியேறி விட்டார்.

அங்கு புதிய ஆட்சியை அமைக்கும் முயற்சியில் அவர்கள் ஈடுபட்டுள்ளனர். ஷரியத் சட்டத்துக்கு உட்பட்டு ஆட்சி நடக்கும் என்று அவர்கள் தெரிவித்துள்ளனர். தலிபான்களிடம் ஆப்கான் வீழ்ந்ததையடுத்து, ஆப்கானிஸ்தானில் உள்ள தங்கள் நாட்டு குடிமக்களை பாதுகாப்பாக தாயகம் அழைத்து வருவதற்கான பணியில் உலக நாடுகள் ஈடுபட்டுள்ளன. அதுதவிர ஆப்கானியர்களே பலரும் அங்கிருந்து வெளியேற முனைப்பு காட்டி வருகின்றனர். இந்திய விமானப் படை விமானங்கள் பாதுகாப்பாக இந்தியர்களை அழைத்து வருந்து கொண்டிருக்கின்றன.

அமெரிக்காவை பொறுத்தவரை அந்நாட்டு தூதர்கள் வெளியேற்றப்பட்ட நிலையில், ஆப்கனில் உள்ள அமெரிக்கர்களையும் அங்கிருந்து வெளியேற்று வருகிறது அந்நாடு. அத்துடன், அமெரிக்காவுக்கு உதவியவர்கள் உள்பட பல்வேறு நாட்டினருக்கு உதவி வந்தவர்களையும் அந்தந்த நாடுகள் பாதுகாப்பாக மீட்டு வருகின்றன.

ஆப்கானிஸ்தானில் இருந்து ஆகஸ்ட் 31ஆம் தேதிக்குள் அனைத்து அமெரிக்கா படைகளும் வெளியேறும் என அமெரிக்கா அதிபர் ஜோ பைடன் அறிவித்திருந்த நிலையில் அங்கு சில அமெரிக்க படையினர் உள்ளனர். காபூல் விமான நிலையத்தின் ஒருபகுதியை கட்டுக்குள் வைத்திருக்கும் அவர்கள் அங்கிருந்து பிற நாட்டவர்கள் செல்லவும் பாதுகாப்பு அளித்து வருகின்றனர்.

காபூலை தாலிபான்கள் கைப்பற்றி ஒருவாரமாகிவிட்ட போதும் விமான நிலையம் இன்னமும் அவர்கள் கட்டுப்பாட்டில் வரவில்லை. இந்த நிலையில், ஆப்கனை விட்டு ஏற்கனவே சொன்ன தேதிக்குள் வெளியேறாவிட்டால் கடும் விளைவுகளை சந்திக்கக் கூடும் என்று அமெரிக்காவுக்கு

தலிபான்கள் எச்சரிக்கை விடுத்துள்ளனர். முன்னதாக, காபூல் விமான நிலையம் மீது பயங்கரவாதிகள் தாக்கக் கூடும் என்று அமெரிக்கா அச்சம் தெரிவித்திருந்த நிலையில், வேறு ஏதாவது காரணத்தை சொல்லி அமெரிக்க படைகள் அங்கேயே இருந்து விடக்கூடாது என்பதால் தலிபான்கள் இந்த எச்சரிக்கையை அவர்கள் விடுத்துள்ளதாக தெரிகிறது.