‘தி ரைசிங் சன்’: வெளியிட்ட முதல்வர் ஸ்டாலின் பெற்றுக் கொண்ட துரைமுருகன்!

‘தி ரைசிங் சன்’: வெளியிட்ட முதல்வர் ஸ்டாலின் பெற்றுக் கொண்ட துரைமுருகன்!

திமுகவின் கருத்துகளை பிற மாநிலத்தவர் அறிந்து கொள்ள கடந்த 1971ஆம் ஆண்டு கலைவாணர் அரங்கில் ‘தி ரைசிங் சன்’ எனும் ஆங்கில இதழ் தொடங்கப்பட்டது. முரசொலி மாறனை ஆசிரியராகக் கொண்டு தொடங்கப்பட்ட அந்த ஆங்கில வார இதழ், பல்வேறு காரணங்களால் 1975ஆம் ஆண்டில் நிறுத்தப்பட்டது.

இதையடுத்து, கடந்த 2005ஆம் ஆண்டு அண்ணா அறிவாலயத்தில் அப்போதைய திமுக தலைவரான கருணாநிதியால் மீண்டும் ‘தி ரைசிங் சன்’ தொடங்கப்பட்டு பின்னர் நிறுத்தப்பட்டது.

இந்த நிலையில், 10 ஆண்டுகள் கழித்து தமிழகத்தில் திமுக மீண்டும் ஆட்சிப் பொறுப்பேற்றுள்ளது. தேசிய அரசியலில் தவிர்க்க முடியாத ஆளுமையாகவும் மாநிலக் கட்சியாக மாறியுள்ள திமுகவின் கொள்கைகளை, திமுக அரசின் செயல்பாடுகளை பிற மாநிலத்தவர், வெளிநாட்டினர் அறிந்து கொள்ளும் வகையில், அக்கட்சியின் அதிகாரப்பூர்வ ஆங்கில இதழான ‘தி ரைசிங் சன்’ மீண்டும் தொடங்கப்பட்டுள்ளது.

திமுகவின் அதிகாரப்பூர்வ ஆங்கில இதழான ‘தி ரைசிங் சன்’ செப்டம்பர் 26 ஆம் தேதி (இன்று) வெளியிடப்படும் என்று அறிவிக்கப்பட்டது. அதன்படி, சென்னை அண்ணா அறிவாலயத்தில் நடைபெற்ற நிகழ்ச்சியில், மாதம் இருமுறை இதழான ‘தி ரைசிங் சன்’ ஆங்கில இதழை திமுக தலைவரும், முதல்வருமான ஸ்டாலின் வெளியிட்டார்.

அதனை அக்கட்சியின் பொதுச் செயலாளர் துரை முருகன் பெற்றுக் கொண்டார். இந்த நிகழ்வின்போது, திமுக இளைஞரணிச் செயலாளர் உதயநிதி ஸ்டாலின், திமுக எம்.பி., டி.ஆர்.பாலு உள்ளிட்ட மூத்த தலைவர்கள் உடனிருந்தனர்.