தலை துண்டித்து கொல்லப்பட்ட பெண்: பசுபதி பாண்டியன் கொலைக்கு பழிக்கு பழி?

தலை துண்டித்து கொல்லப்பட்ட பெண்: பசுபதி பாண்டியன் கொலைக்கு பழிக்கு பழி?

திண்டுக்கல் அருகே நந்தவனப்பட்டியில் தேவேந்திரகுல வேளாளர் கூட்டமைப்பின் நிறுவனத் தலைவராக இருந்த பசுபதி பாண்டியன் வசித்து வந்தார். கடந்த 2012ஆம் ஆண்டில் அவரது வீட்டில் மர்ம கும்பல் ஒன்றால் படுகொலை செய்யப்பட்டார்.

இது தொடர்பாகத் தூத்துக்குடி மாவட்டத்தை சேர்ந்த சுபாஷ் பண்ணையார் உள்ளிட்ட 18 பேர் மீது தாடிக்கொம்பு போலீஸார் கொலை வழக்குப் பதிவு செய்தனர். இந்த வழக்கானது திண்டுக்கல் மாவட்ட எஸ்.சி., எஸ்.டி., பிரிவு நீதிமன்றத்தில் நடைபெற்று வருகிறது.

இதனிடையே, பசுபதிபாண்டியன் கொலையில் தொடர்புடையதாகக் குற்றம் சாட்டப்பட்ட 18 பேரில் ஆறுமுகசாமி, புறா மாடசாமி, பாட்ஷா, முத்துப்பாண்டி ஆகியோர் அடுத்தடுத்து கொலை செய்யப்பட்டனர். அவர்கள் பசுபதி பாண்டியன் ஆதரவாளர்களால் கொலை செய்யப்பட்டதாக கூறப்படுகிறது.

இந்த நிலையில், பசுபதிபாண்டியன் கொலை வழக்கில் கொலையாளிகளுக்கு உதவியதாகக் கூறி ஐந்தாவது குற்றவாளியாகச் சேர்க்கப்பட்ட திண்டுக்கல் நந்தவனப்பட்டியைச் சேர்ந்த நிர்மலா (69) என்பவர் மர்ம கும்பல் ஒன்றால் கொலை செய்யப்பட்டுள்ளார். நூறு நாள் வேலைத்திட்டத்தில் பணிக்குச் சென்ற அவரை கொலை செய்த கும்பல், அவரது தலையை துண்டித்து சிறிது தூரத்தில் உள்ள பசுபதிபாண்டியன் கொலையான வீட்டின் முன்பு வைத்துச் சென்றனர்.

தகவலறிந்த திண்டுக்கல் டிஐஜி விஜயகுமாரி, மாவட்ட எஸ்.பி. சீனிவாசன் ஆகியோர் சம்பவ இடத்தில் விசாரணை மேற்கொண்டனர். இதுகுறித்து தாடிக்கொம்பு போலீஸார் வழக்குப் பதிவு செய்து குற்றவாளிகளை தேடி வருகின்றனர். பசுபதி பாண்டியன் கொலைக்கு பழிக்கு பழியாக நிர்மலா கொலை செய்யப்பட்டாரா என்ற கோணத்திலும் போலீசார் விசாரணை மேற்கொண்டு வருகின்றனர்.