அரசுப் பள்ளி மாணவர்களுக்கு முதல்வர் ஸ்டாலின் ஹேப்பி நியூஸ்!

அரசுப் பள்ளி மாணவர்களுக்கு முதல்வர் ஸ்டாலின் ஹேப்பி நியூஸ்!

அரசுப் பள்ளி மாணவர்களும், தனியார் பள்ளிகளில் பயிலும் மாணவர்களும் வெவ்வேறு சமூகப் பொருளாதாரப் பின்னணியை கொண்டவர்கள். இவர்கள் கற்கும் பள்ளி, வளரும் வீட்டுச் சூழல், பெற்றோர் வருமானம் போன்றவற்றில் வேறுபாடுகள் உள்ளன. இதனைக் கருத்தில் கொண்டு மருத்துவப் படிப்பில் தமிழக அரசுப் பள்ளி மாணவர்களுக்கு 7.5 சதவீதம் உள் ஒதுக்கீடு செய்யப்பட்டுள்ளது.

அதன் தொடர்ச்சியாக, பொறியியல், வேளாண்மை, கால்நடை, மீன்வளம், சட்டம் போன்ற தொழிற்கல்வி படிப்புகளில் அரசுப் பள்ளிகளில் பயின்ற மாணவர்களுக்கு உள் இடஒதுக்கீடு வழங்கப்பட வேண்டும் என்று கோரிக்கைகள் எழுந்தன. இதற்காக அமைக்கப்பட்ட குழுவின் பரிந்துரையின் அடிப்படையில், மருத்துவக் கல்வி மாணவர் சேர்க்கையில் 7.5 சதவீதம் ஒதுக்கீடு வழங்கியதைப்போன்றே, அரசுப் பள்ளிகளில் பயின்ற மாணவர்களுக்கு ஏனைய தொழிற் கல்விப் படிப்புகளில் 7.5 சதவீதம் ஒதுக்கீடு வழங்கும் சட்டம் முதல்வர் ஸ்டாலின் தலைமையிலான திமுக அரசால் கடந்த சட்டமன்றக் கூட்டத்தொடரில் இயற்றப்பட்டது.

அரசுப் பள்ளிகள், மாநகராட்சிப் பள்ளிகள், நகராட்சிப் பள்ளிகள், ஊராட்சி ஒன்றிய பள்ளிகள், ஆதிதிராவிடர் மற்றும் பழங்குடியினர் நலப்பள்ளிகள், கள்ளர் சீர்திருத்தப் பள்ளிகள், வனத்துறைப் பள்ளிகள் மற்றும் அரசுதுறைகளினால் நிர்வகிக்கப்படும் பிற பள்ளிகளில் 6 முதல் 12 ஆம் வகுப்பு வரை பயின்ற மாணாக்கர்கள்இந்த இடஒதுக்கீட்டின் கீழ் பயன் பெறுகிறார்கள்.

நடப்பு கல்வி ஆண்டில், இந்த சிறப்புஉள்ஒதுக்கீட்டு மூலம் பொறியியல் படிப்புகளில்சுமார் 10,000 அரசு பள்ளி மாணாக்கர்கள் பயன்பெறுவர். அதேபோல, அரசு பள்ளிகளில் பயின்ற சுமார் 350 மாணவர்கள் வேளாண்மை, கால்நடை மருத்துவம், மீன்வளம் மற்றும் சட்டப் படிப்புகளிலும் பயன் பெறுவார்கள்.

இந்த நிலையில், சென்னை, அண்ணா பல்கலைக்கழகத்தில் நடைபெற்ற நிகழ்ச்சியில், 7.5 சதவீத சிறப்பு உள் ஒதுக்கீட்டின் அடிப்படையில் பொறியியல் படிப்பிற்குத் தேர்வு செய்யப்பட்ட அரசுப் பள்ளி மாணாக்கர்களுக்கு சேர்க்கை ஆணைகளை வழங்கிடும் அடையாளமாக, 50 மாணாக்கர்களுக்கு அதனை முதல்வர் ஸ்டாலின் வழங்கினார்.

அப்போது பேசிய முதல்வர் ஸ்டாலின், “அரசுப் பள்ளிகளில் படித்து 7.5 சதவீத இட ஒதுக்கீடு மூலம் தொழிற் கல்லூரிகளில் சேரும் மாணவர்களுடைய கல்விக்காக ஆகக்கூடிய செலவு கல்விக் கட்டணம், விடுதிக் கட்டணம், ஏன் கலந்தாய்வுக் கட்டணம் உள்ளிட்ட அனைத்தையும் அரசு ஏற்றுக்கொள்ளும்” என்ற அறிவிப்பை வெளியிட்டார்.