விலகிய பாமக, நாங்க சும்மா இருக்க மாட்டோம் - ஜெயக்குமார் பரபரப்பு!

விலகிய பாமக, நாங்க சும்மா இருக்க மாட்டோம் - ஜெயக்குமார் பரபரப்பு!

தமிழகத்தில் எஞ்சியுள்ள 9 மாவட்டங்களுக்கு வரும் அக்டோபர் மாதம் 6, 9 ஆகிய தேதிகளில் ஊரக

உள்ளாட்சி தேர்தல் நடைபெறவுள்ளது. இந்த தேர்தலில் போட்டியிடுவது தொடர்பாக பாமக நிர்வாகிகள் கூட்டம் நேற்று நடைபெற்றது. அதில், பாமக தனித்துப் போட்டியிடுவதாக முடிவு செய்யப்பட்டது. இந்நிலையில் நிர்வாகிகள் கூட்டத்தில் பாமக நிறுவனர் ராமதாஸ் பேசியவை குறித்து தகவல்கள் வெளியாகியுள்ளன. அதாவது, கடந்த சட்டமன்ற தேர்தலில் கூட்டணித் தர்மத்தை அதிமுக காப்பாற்றவில்லை. அதிமுகவிற்கு சரியான தலைமை இல்லாததால் அக்கட்சியினர் நமக்கு ஒத்துழைப்பு அளிக்கவில்லை. நம்மால் கூட்டணி கட்சிகள் பயனடைந்தன.

விலகியது அவர்கள் விருப்பம்

ஆனால் நமக்கு அவர்களால் பலன் இல்லை. எனவே உள்ளாட்சி தேர்தலில் தனித்து நின்று நமது வாக்கு சதவீதத்தை நிரூபிப்போம் என்று தெரிவித்ததாக கூறப்படுகிறது. இதுதொடர்பாக இன்று (செப்டம்பர் 15) கருத்து தெரிவித்த அதிமுக முன்னாள் அமைச்சர் டி.ஜெயக்குமார், எங்களது கூட்டணியில் நீடிக்கலாமா? வேண்டாமா? என்பது பற்றி அவர்கள் முடிவு எடுத்துக் கொள்ளட்டும். யாருடைய கட்டாயத்தின் பேரில் முடிவு எடுத்தனர் என்பது பற்றி எங்களுக்கு தெரியாது. எழுதப்படாத ஒப்பந்தம் போல சிலருடன் சேர்ந்து முடிவுகளை எடுத்திருக்கலாம். அது அவர்கள் விருப்பம். அதனை நான் விமர்சிக்கவில்லை.

கொதித்தெழுந்த ஜெயக்குமார்

உள்ளாட்சி தேர்தலில் தனித்து போட்டியிடுவதால் அவர்களுக்கு தான் இழப்பு. எங்களுக்கு எந்தவித இழப்பும் கிடையாது. அதற்காக எங்கள் கட்சியை விமர்சனம் செய்வதை எந்த விதத்திலும் ஏற்றுக் கொள்ள முடியாது. இவ்வாறு விமர்சனம் செய்யும் நிலை தொடர்ந்தால், நாங்களும் பாமகவை விமர்சனம் செய்ய வேண்டி வரும். அதிமுகவை பொறுத்தவரை கடந்த 10 ஆண்டுகால ஆட்சியில் எத்தனையோ நன்மைகளை தமிழக மக்களுக்கு செய்திருக்கிறோம். ஆனால் திமுகவோ பொய்யான வாக்குறுதிகளை அளித்து ஆட்சிக்கு வந்துவிட்டு, தற்போது எதையும் நிறைவேற்ற முடியாமல் தவிக்கின்றனர்.

நிச்சயம் கைகொடுக்கும்

இவ்வாறு தமிழக மக்களை மொட்டை அடித்து விட்டனர். அதன் தாக்கம் வரும் உள்ளாட்சி தேர்தலில் திமுகவிற்கு எதிராக இருக்கும். அதேபோல் எங்களுடைய திட்டங்களையும் மக்களுக்கு எடுத்துச் சொல்வோம். ஜெயலலிதாவின் ஆட்சியிலும் சரி, எடப்பாடி பழனிசாமி ஆட்சியிலும் சரி. அனைத்து விதமான நன்மைகளையும் மக்களுக்கு செய்திருக்கிறோம். இவையெல்லாம் நிச்சயம் கைகொடுக்கும் என்ற நம்பிக்கை இருக்கிறது. மக்கள் எங்களோடு இருக்கும் வரை, எந்த காலத்திலும் எந்தவொரு இழப்பும் கிடையாது என்று கூறினார்.