கமல்ஹாசன் மீது அதிருப்தி? - மக்கள் நீதி மய்யம் கட்சியில் இருந்து விலகுகிறாரா பழ. கருப்பையா?

கமல்ஹாசன் மீது அதிருப்தி? - மக்கள் நீதி மய்யம் கட்சியில் இருந்து விலகுகிறாரா பழ. கருப்பையா?

தமிழகத்தின் மூத்த அரசியல் தலைவரான பழ. கருப்பையா, கட்சி தாவலுக்கு பெயர் போனவர். காங்கிரஸ், சிண்டிகேட் காங்கிரஸ், ஜனதா, ஜனதா தளம், திமுக, மதிமுக, அதிமுக, மீண்டும் திமுக என்று, எட்டு முறை கட்சி தாவி வந்த அவர், தற்போது, கமல் ஹாசனின் மக்கள் நீதி மய்யம் கட்சியில் இருக்கிறார். இந்நிலையில் அவர், ம.நீ.ம.,வை விட்டு வெளியேற உள்ளதாக தகவல் பரவி வருகிறது.

செய்தி நிறுவனம் ஒன்றிற்கு பழ. கருப்பையா பேட்டி கொடுத்த போது, மக்கள் நீதி மய்யம் கட்சியில் ஒரு ஆலோசகராக என்னென்ன ஆலோசனை வழங்கினீர்கள் என்ற கேள்விக்கு பதிலளித்த பழ. கருப்பையா, கமலும் என்னிடம் ஆலோசனை கேட்கவில்லை; நானும் எதுவும் சொல்லவில்லை. கௌரவத்திற்காக தான் எனக்கு அந்த பதவியை தந்திருக்கிறார்கள் என்று, நக்கலாக பதில் சொன்னார்.

உண்மையிலேயே மக்கள் நீதி மய்யம் கட்சியை விட்டு விலகும் எண்ணம் இருக்கிறதா? விஜய் மக்கள் இயக்கத்தில் இணைகிறீர்களா என்ற கேள்விக்கு, கட்சியை விட்டு விலகும் காரணம் இப்போதைக்கு எதுவும் இல்லை. விஜய் மக்கள் இயக்கத்திற்கு செல்கிறேன் என்றால், விஜய் கட்சியா வைத்திருக்கிறார். போய் நின்று கொள்ளுங்கள் என்று உள்ளாட்சித் தேர்தலில் ரசிகர்களிடம் சொல்லி இருக்கிறார். மற்றபடி அவர் இன்னும் அரசியலுக்கு வரவில்லை. நான் ஏன் அங்கு போக போகிறேன் என்று தெரிவித்தார்.

உண்மையில், மக்கள் நீதி மய்யம் கட்சியில் உள்ளாட்சித் தேர்தலில் ஆர்வம் காட்டவில்லை போலிருக்கிறதே என்ற கேள்விக்கு, ஏதோ பண்றாங்க.. என்ன பண்றாங்கன்னு பார்ப்போம். அதற்கெல்லாம் நிறைய பேர் இருக்காங்க என்று சலிப்பாக பதில் அளித்தார்.

பழ. கருப்பையாவின் பேட்டியை பார்க்கும் போது, மக்கள் நீதி மய்யம் கட்சித் தலைவர் கமல்ஹாசன் மீது அவர் அதிருப்தியில் இருப்பதாகத் தெரிகிறது. இதை எல்லாம் பார்த்தால், அவர் விரைவில், மக்கள் நீதி மய்யம் கட்சியில் இருந்து விலகி வேறொரு கட்சியில் இணைய அதிக வாய்ப்பு உள்ளதாக தகவல்கள் தெரிவிக்கின்றன.