ஒரு வார்டில் கூட தோற்கவில்லை.. கெத்து காட்டிய மம்தா பானர்ஜி

ஒரு வார்டில் கூட தோற்கவில்லை.. கெத்து காட்டிய மம்தா பானர்ஜி

தேர்தலில் ஒரு வார்டில் கூட தோற்கவில்லை என்று மேற்கு வங்க முதல்வர் மம்தா பானர்ஜி பெருமிதம்.

மேற்கு வங்க சட்டமன்ற தேர்தலில் திரிணமூல் காங்கிரஸ் கட்சி தலைவர் மம்தா பானர்ஜி நந்திகிராம் தொகுதியில் போட்டியிட்டார். தேர்தலில் திரிணமூல் காங்கிரஸ் கட்சி வெற்றிபெற்றாலும், நந்திகிராம் தொகுதியில் மம்தா பானர்ஜி தோல்வியடைந்தார்.நந்திகிராம் மக்கள் என்ன முடிவை எடுத்தாலும் அதை முழு மனதுடன் ஏற்பதாக அப்போதே மம்தா பானர்ஜி தெரிவித்தார். பின்னர் முதல்வராக பதவியேற்ற மம்தா பானர்ஜி ஆறு மாதத்துக்குள் ஏதேனும் ஒரு சட்டமன்ற தொகுதியில் வெற்றிபெற வேண்டும்.

இதைத்தொடர்ந்து, தனது வழக்கமான தொகுதியான பபானிபூர் இடைத்தேர்தலில் மம்தா பானர்ஜி போட்டியிட்டார். அவரை எதிர்த்து பாஜக வேட்பாளர் பிரியங்கா தப்ரெவால் போட்டியிட்டார். இன்று வாக்கு எண்ணிக்கை நடைபெற்றது.இந்நிலையில், 58,832 வாக்கு வித்தியாசத்தில் மம்தா பானர்ஜி வெற்றிபெற்றுள்ளார். வாக்கு எண்ணிக்கை இறுதிச்சுற்று முடிந்தபிறகு மம்தா பானர்ஜி செய்தியாளர்களிடம் பேசியபோது, “தொகுதியில் ஒரு வார்டில் கூட தோல்வி அடையவில்லை என்பது மகிழ்ச்சி.

முந்தைய தேர்தல்களில் நான் ஓரிரு வார்டுகளில் பின் தங்கியிருந்தேன். சட்டமன்ற தேர்தலில் எங்களுக்கு எதிராக நிறைய சதிகள் நடந்தன. இப்போது வெற்றிபெற வைத்ததற்கு மக்களுக்கு நன்றி” என்று தெரிவித்துள்ளார்.

இதற்கு முன் 2011, 2016 ஆகிய ஆண்டுகளில் நடைபெற்ற சட்டமன்ற தேர்தல்களிலும் பபானிபூர் தொகுதியில் மம்தா பானர்ஜி போட்டியிட்டு வெற்றிபெற்றது குறிப்பிடத்தக்கது.