வீட்டு உபயோக மின் கட்டணம் உயருகிறது… பொதுமக்களுக்கு ஷாக்!

வீட்டு உபயோக மின் கட்டணம் உயருகிறது… பொதுமக்களுக்கு ஷாக்!

புதுச்சேரி யூனியன் பிரதேசத்தில் வீட்டு உபயோக மின் கட்டணம் திடீரென உயர்த்தப்பட்டுள்ளது.

யூனியன் பிரதேசமான புதுச்சேரியில் ஆண்டுதோறும் இணை மின்சார ஒழுங்குமுறை ஆணையத்தின் அறிவுறுத்தலின்படி மின்கட்டணம் நிர்ணயிக்கப்படுகிறது. 2022-2023ம் ஆண்டுக்கான உத்தேச மின் கட்டணம் தற்போது அறிவிக்கப்பட்டுள்ளது.

அதன்படி வீட்டு உபயோக மின்கட்டணம் உயர்த்தப்படுகிறது. 100 யூனிட்டுக்குள் ரூ.1.55 ஆக இருந்த கட்டணம் 35 பைசா உயர்ந்து ரூ.1.90 ஆகவும், 101ல் இருந்து 200 யூனிட் வரை ரூ.2.60 ஆக இருந்த கட்டணம் 15 பைசா உயர்ந்து ரூ.2.75 ஆகவும் உயர்கிறது. 201 யூனிட்டுக்கு மேல் வீட்டு உபயோக கட்டணங்களில் எந்த மாற்றமும் இல்லை. வர்த்தகம், விவசாய மின் கட்டணங்களில் எந்த மாற்றமும் இல்லை. வழக்கமாக ஜனவரி மாதத்தின் இறுதியில் ஆண்டுதோறும் பொதுமக்கள் கருத்து கேட்பு கூட்டம் நடைபெறும்.

இந்த கூட்டத்துக்கு பின் உத்தேச கட்டணம் நிர்ணயிக்கப்பட்டு அறிவிக்கப்படும். கடந்த சில ஆண்டுகளாக இந்த நடைமுறை பின்பற்றப்படுகிறது. இந்த நடைமுறைக்கு பொதுமக்கள் எதிர்ப்பு தெரிவித்தாலும் கட்டணம் குறைக்கப்படவில்லை.இந்த ஆண்டு கொரோனா காரணமாக கருத்து கேட்பு கூட்டம் காணொலி வாயிலாக நடத்த திட்டமிட்டுள்ளனர். வரும் 28ம் தேதி காணொலி வாயிலாக கருத்துக்கேட்பு நடத்தப்படும் என அறிவிக்கப்பட்டுள்ளது. இந்த கூட்டத்துக்கு பின் உத்தேச கட்டணமே அல்லது மேற்படி நிர்ணயிக்கப்பட்ட கட்டணமாக அறிவிக்கப்பட்டு வரும் ஏப்ரல் 1ம் தேதி முதல் அமலுக்கு வரும் என மின்துறை அதிகாரிகள் தெரிவிக்கின்றனர். இதனால் புதுச்சேரியில் வீட்டு உபயோக மின் கட்டணம் உயர்வது உறுதியாகியுள்ளது.