விமானங்கள் திடீர் ரத்து... பயண கட்டணமும் நே ரிட்டன்: பயணிகள் அதிர்ச்சி!

விமானங்கள் திடீர் ரத்து... பயண கட்டணமும் நே ரிட்டன்: பயணிகள் அதிர்ச்சி!

கொரோனா வைரஸ் பரவல், பொங்கல் பண்டிகை தொடர் விடுமுறை காரணமாக சென்னை விமான நிலையத்தில் ஒரே நாளில் 32 விமானங்கள் ரத்து செய்யப்பட்டுள்ளன.

சென்னை சர்வதேச விமான நிலையத்தில் இருந்து உலகின் பல்வேறு நாடுகளுக்கு தினமும் விமானங்கள் இயக்கப்பட்டு வருகின்றன. இதேபோன்று சென்னை உள்நாட்டு முனையத்தில் இருந்தும் நாட்டின் பல்வேறு மாநகரங்களுக்கு நாள்தோறும் நூற்றுக்கணக்கான விமானங்கள் இயக்கப்படுகின்றன.

இந்த நிலையில் பொங்கல் பண்டிகை தொடர் விடுமுறை, கொரோனா மூன்றாவது அலை மற்றும் ஒமைக்ரான் வைரஸ் பரவல் போன்ற காரணங்களால் உள்நாட்டு விமான பயணிகளின் எண்ணிக்கை கடந்த சில நாட்களாக குறைந்து காணப்பட்டது. இதனையடுத்து நேற்று ஒரே நாளில் சென்னை விமான நிலையத்தில் 32 உள்நாட்டு விமானங்களின் சேவை ரத்து செய்யப்பட்டது.

அதாவது மதுரை, தூத்துக்குடி, பெங்களூரு, விசாகப்பட்டினம், ராஞ்சி, டெல்லி, மும்பை, கொல்கத்தா உள்ளிட்ட மாநகரில் இருந்து சென்னைக்கு வரவேண்டிய 16 விமானங்கள் 16 விமானங்கள் ரத்து செய்யப்பட்டுள்ளன.

இதேபோன்று, எதிர்திசையில் சென்னை நகரில் இருந்து குறிப்பிட்ட நகரங்களுக்கு இயக்கப்படும் 16 இணை விமானங்களும் ரத்து செய்யப்பட்டுள்ளன. அடுத்த சில தினங்களில் மேலும் சில, பல விமானங்கள் ரத்து செய்யப்பட வாய்ப்புள்ளதாக தகவல் வெளியாகி உள்ளதால் பயணிகள் அதிர்ச்சி அடைந்துள்ளனர்.

ரத்தான விமான பயணத்துக்கான டிக்கெட் கட்டணம் பயணிகளுக்கு திரும்ப அளிக்கப்படமாட்டாது எனவும், ஏற்கெனவே பதிவு செய்த டிக்கெட்டுகளுக்கான பயணத்தை மார்ச் 31 ஆம் தேதிக்குள் பயணிகள் பயன்படுத்தி கொள்ளலாம் என்றும் விமான நிறுவனங்களின் நிர்வாகம் தெரிவித்துள்ளன.

பயணிகள் ஏற்கெனவே புக் செய்த நகரத்துக்கே பயணி்க்க வேண்டும் என்ற அவசியமில்லை; அவர்கள் விரும்பும் நகரங்களுக்கு பயணிக்கலாம் என்றும் விமான நிறுவனங்கள் தெரிவித்திருந்தாலும், இந்த முடிவுக்கு பெரும்பாலான பயணிகள் மத்தியில் எதிர்ப்பு கிளம்பியுள்ளது. தங்களது பயண கட்டணத்தை திரும்ப தர வேண்டும் என்று அவர்கள் வலியுறுத்தி உள்ளனர்.

கடந்த மாதத்தில் நாள் ஒன்றுக்கு 30 ஆயிரமாக இருந்த உள்நாட்டு பயணிகளின் எண்ணிக்கை கடந்த வாரம் 20 ஆயிரமாக குறைந்தது. இதன் காரணமாக உள்நாட்டு விமானங்களின் எண்ணிக்கை 270 இல் இருந்து 206 ஆக குறைந்தது. அந்த எண்ணிக்கை தற்போது 183 ஆக மேலும் குறைந்துள்ளது குறிப்பிடத்தக்கது.