‘தல, சின்ன தல மிரட்டல் பேட்டிங்’…ஆஸ்திரேலியா கதறல்: இறுதிப் போட்டியில் இந்திய அணி!

‘தல, சின்ன தல மிரட்டல் பேட்டிங்’…ஆஸ்திரேலியா கதறல்: இறுதிப் போட்டியில் இந்திய அணி!

இந்திய இளம் படை சிறப்பாக விளையாடி, இறுதிப் போட்டிக்கு முன்னேறியுள்ளது.

19 வயதுக்கு உட்பட்டோருக்கான ஒருநாள் உலகக் கோப்பை தொடர் தற்போது நடைபெற்று வருகிறது. லீக், காலிறுதி சுற்றுகள் அனைத்தும் நடந்து முடிந்து, அடுத்து அரையிறுதி சுற்றுகள் துவங்கின. முதல் அரையிறுதிப் போட்டியில் இங்கிலாந்து, ஆப்கானிஸ்தான் அணிகள் மோதிய நிலையில், அதில் இங்கிலாந்து அணி 15 ரன்கள் வித்தியாசத்தில் வெற்றிபெற்று இறுதிப் போட்டிக்கு முன்னேறியது.

இதனைத் தொடர்ந்து இரண்டாவது அரையிறுதிப் போட்டியில் இந்தியா, ஆஸ்திரேலிய அணிகள் மோதின. இதில் டாஸ் வென்ற இந்திய அணி பேட்டிங்கை தேர்வு செய்தது.

இந்திய இன்னிங்ஸ்:

முதலில் களமிறங்கிய இந்திய அணியில் ஓபனர்கள் அங்கிரிஷ் 6 (30), ஹனோர் சிங் 16 (28) இருவரும் பெரிய ஸ்கோர் அடிக்காமல் ஆட்டமிழந்தனர். இதனால், இந்திய அணிக்கு துவக்கத்திலேயே நெருக்கடி ஏற்பட்டது. இந்நிலையில் கேப்டன் யாஷ் துல், துணைக் கேப்டன் ஷேக் ரஷித் இருவரும் பெரிய பார்ட்னர்ஷிப் அமைத்து, ஆஸி பௌலர்களுக்கு நெருக்கடியை ஏற்படுத்தினர்

இந்த பார்ட்னர்ஷிப் 100, 150, 200 என ரன்களை குவித்தது. இதனால், இந்திய அணியின் ஸ்கோரும் சிறப்பான ஏற்றம் கண்டது. இறுதியில் யாஷ் துல் 110 (110), ஷேக் ரஷித் 94 (108) இருவரும் அடுத்தடுத்த பந்துகளில் ஆட்டமிழந்து நடையைக் கட்டினர். அடுத்து ராஜ்வர்தன் 13 (10), நிஷாந்த் சிந்து 12 (10), தினேஷ் பானா 20 (4) ஆகியோர் ஓரளவுக்கு ரன்களை சேர்த்ததால், இந்திய அணி 50 ஓவர்கள் முடிவில் 290/5 ரன்களை குவித்தது.

ஆஸி இன்னிங்ஸ்:

இலக்கை துரத்திக் களமிறங்கிய ஆஸ்திரேலிய அணியில் லச்லன் ஷா 51 (66), சாம்பெல் 30 (53), கோரி மில்லர் 38 (46) ஆகியோர் மட்டுமே ஓரளவுக்கு பெரிய ஸ்கோர் அடித்தனர். மற்றவர்கள் வந்த வேகத்தில் நடையைக் கட்டியதால், ஆஸ்திரேலிய அணி 41.5 ஓவர்கள் முடிவில் 194/10 ரன்கள் மட்டும் சேர்த்து, 96 ரன்கள் வித்தியாசத்தில் படுதோல்வியை சந்தித்து, இறுதிப் போட்டிக்கான வாய்ப்பை இழந்தது.

பிப்ரவரி 5ஆம் தேதி நடைபெறும் இறுதிப் போட்டியில் இந்தியா, இங்கிலாந்து அணிகள் மோதவுள்ளன. இப்போட்டி, இந்திய நேரப்படி மாலை 6:30 மணிக்கு துவங்கும் என்பது குறிப்பிடத்தக்கது.