அவருக்கு அந்த புத்தி இல்லை... பாஜக அண்ணாமலையை சாடிய திமுக அமைச்சர்!

தமிழக பாஜக தலைவர் அண்ணாமலைக்கு அரசியல் புத்தி இல்லை என்று தமிழக போக்குவரத்து் துறை அமைச்சர் ராஜ கண்ணப்பன் விமர்சித்துள்ளார்.

செய்தி மக்கள் தொடர்புத்துறை சார்பில் புதிய பஸ் நிலையம் பகுதியில் 75-வது சுதந்திர தின கொண்டாட்டத்தையொட்டி விடுதலைப்போரில் தமிழகம் என்ற பெயரிலான புகைப்பட கண்காட்சி ராமநாதபுரத்தில் நடைபெற்று வருகிறது. இந்த ண்காட்சியை போக்குவரத்து துறை அமைச்சர் ராஜகண்ணப்பன் தொடங்கி வைத்தார். அதன் பின்னர் அவர் செய்தியாளர்களிடம் கூறியது:

திமுக தேர்தல் அறிக்கையில் தெரிவித்தபடி முதல்வர் மு.க.ஸ்டாலின் உத்தரவிட்டு, நகர பேருந்துகளில் பெண்கள் இலவசமாக பயணம் செய்து வருகின்றனர். இதற்காக 1,510 கோடி ரூபாய் ஒதுக்கீடு செய்யப்பட்டுள்ளது.ஆண்களுக்கு இலவச பஸ் பயண அனுமதி என்பது சாத்தியமில்லை.

போக்குவரத்து கழகங்கள் ஏற்கெனவே 48 ஆயிரம் கோடி ரூபாய் அளவுக்கு நஷ்டத்தில் இயங்கி வருகின்றன. இந்த நிலையில் டீசல் விலை உயர்த்தப்பட்டுள்ளது. இதனால் பணிமனைகளுக்கு இந்தியன் ஆயில் கார்ப்பரேசன் மூலம் லிட்டருக்கு 69 பைசா குறைவாக டீசல் வாங்க நடவடிக்கை எடுக்கப்பட்டுள்ளது.

போக்குவரத்து தொழிலாளர்களின் ஓய்வூதியம் உள்ளிட்ட கோரிக்கைகள் நியாயமானது. நிதி நிலைமை சீரானதும் முதல்வரிடம் கலந்து பேசி அவர்களின் கோரிக்கைகளை நிறைவேற்ற நடவடிக்கை எடுக்கப்படும்.

மாணவர்கள் பள்ளி செல்லும் நேரங்களில் பஸ் படிக்கட்டில் தொங்கியபடி பயணிப்பது உண்மைதான். பஸ்சில் இடம் இருந்தாலும் மாணவர்கள் படிக்கட்டில் தொங்கி கொண்டு செல்வதை பார்க்க முடிகிறது. தேவைப்படும் இடங்களுக்கு பஸ் வசதி செய்து தரப்படும்.

தான் இன்னும் போலீஸ் என்ற நினைப்பில் தான் தமிழக பாஜக தலைவர் அண்ணாமலை இருக்கிறார். அவருக்கு இன்னமும் போலீஸ் புத்திதான் உள்ளது. அரசியல் புத்தி இல்லை. அவருக்கு அரசியல் தெரியாது. சொல்ல வேண்டும் என்பதற்காக எதையாவது சொல்லிக்கொண்டிருக்கிறார் என்று அமைச்சர் ராஜகண்ணப்பன் விமர்சித்துள்ளார்.