அதிமுகவுக்குள் அடுத்த பஞ்சாயத்து: சுமூகமாக முடிக்க ப்ளான் போட்ட எடப்பாடி!
அதிமுகவில் எதிர்க்கட்சித் தலைவரை தேர்ந்தெடுப்பதற்காக நடைபெற்ற பிரச்சினைகள் ஒருவழியாக முடிவுக்கு வந்துள்ளது. அமைச்சர் பதவிக்கு நிகரான எதிர்க்கட்சித் தலைவர் பதவியை பிடித்து விட வேண்டும் என்று ஓபிஎஸ் முனைப்பு காட்டி வந்தார். ஆனால், கொங்கு மண்டலத்தில் அடைந்த வெற்றியை சுட்டிக் காட்டி விடாப்படியாக இருந்த எடப்பாடி பழனிசாமியே கட்சிக்குள் இருந்த ஆதரவால் எதிர்கட்சித் தலைவராக தேர்ந்தெடுக்கப்பட்டார்.
அதிமுக எம்.எல்.ஏ.க்கள் கூட்டத்தில் ஓபிஎஸ்-ஈபிஎஸ் ஆகியோருக்கு இடையே நடைபெற்ற காரசார விவாதத்திற்கு இடையே, எதுவேண்டுமானாலும் செய்து கொள்ளுங்கள் என்று கோபத்துடன் ஓபிஎஸ் சென்று விட்டதாக கூறப்பட்டது. அதன்பின்னர், ஈபிஎஸ் உள்ளிட்ட அதிமுக மூத்த நிர்வாகிகள் பட்டாளமே சென்று ஒபிஎஸ்ஸை சமாதானப்படுத்தியது.
பொதுவாக எதிர்க்கட்சித் தலைவரை தேர்ந்தெடுக்கும் போதே
எதிர்க்கட்சித் துணைத் தலைவர், கொறடா ஆகியோரும் தேர்ந்தெடுக்கப்பட்டு விடுவர். ஆனால், அன்றைய தினம் எதிர்க்கட்சித் துணைத் தலைவராக இருந்து கொள்ளுங்கள் என்று வைக்கப்பட்ட கோரிக்கையையும் ஓபிஎஸ் நிராகரித்து விட்டு சென்று விட்டார். இதனால், கடும் சலசலப்புகளுக்கு இடையே அக்கூட்டத்தில் எதிர்க்கட்சித் துணைத் தலைவர், கொறடா ஆகியோர் தேர்வு செய்யப்படவில்லை.
இந்த நிலையில், தற்போது அதிமுகவுக்குள் அடுத்த பஞ்சாயத்தாக எதிர்க்கட்சித் துணைத் தலைவர், கொறடாவுக்கான போட்டி கிளம்பியுள்ளது. எம்.பி.பதவியை ராஜினாமா செய்த கே.பி.முனுசாமி சட்டமன்றத்துக்குள் முக்கியமான பதவி வேண்டும் என்று கோருகிறாராம். வட மாவட்டங்களில் வன்னியர்கள் வாக்கு அதிகமாக விழுந்த காரணத்தினாலேயே அதிமுக மதிப்புமிகு தோல்வியை சந்தித்துள்ளதால் வன்னிய சமூகத்தை சேர்ந்த அவருக்கு அப்பதவியை கொடுக்க வேண்டும் என்ற குரல்களும், ஏற்கனவே, கட்சி கவுண்டர் கட்டுப்பாட்டில் சென்று விட்டதாக கூறப்படும் நிலையில், தென் மாவட்டத்தை சேர்ந்த முக்குலத்தோர் சமூகத்தினருக்கு இப்பதவிகளில் ஒன்றை கொடுத்து தென் மாவட்டத்தையும் அச்சமூகத்தினரையும் அதிமுக புறக்கணிக்கவில்லை என்பதை கட்டலாம் என்ற குரல்களும் எழுந்து வருகின்றனவாம்.
இந்த தகவல்கள் அனைத்தும் எடப்பாடி பழனிசாமி காதுகளுக்கு கொண்டு செல்லப்பட்டுள்ளது. ஆனால், அவரோ ஓபிஎஸ் அன்றைய தினம் கோபத்தில் எதிர்க்கட்சித் துணைத் தலைவர் பதவி வேண்டாம் என்று சொல்லியிருக்கலாம். அதற்காக அவரை விட்டுக் கொடுக்க முடியாது. ஏற்கனவே அம்மா காலத்தில் முதல்வர், எதிர்கட்சித் தலைவர், அவை முன்னவரா இருந்திருக்காரு ஓபிஎஸ். எனவே, அவருக்குத் தான் அப்பதவியை கொடுக்க வேண்டும். இல்லையென்றால் தேவையில்லாத பிரச்சினை வந்து விடும். அதனால், நானே அவரை சமாதானப்படுத்தி அப்பதவியை ஏற்க சொல்கிறேன். ஒருவேளை அவர் முற்றிலும் தவிர்த்து விட்டால் அப்புறம் பார்த்துக் கொள்ளலாம் என்று சொல்லிவிட்டாராம்.
எனவே, ஓபிஎஸ்-க்கு எதிர்க்கட்சித் துணைத் தலைவர் பதவி கொடுத்து முக்குலத்தோர், தென் மாவட்டத்தை குஷி படுத்திவிட்டு, கொறடாவை வன்னிய சமூகத்தை சேர்ந்த யாருக்காவது கொடுத்து அவர்களையும் குஷி படுத்திவிடலாம் என்ற முடிவில் எடப்பாடி பழனிசாமி இருக்கிறதாக கூறுகிறார்கள்.
No comments:
Post a Comment