tauktae புயல் தமிழகத்தை தாக்குமா? புவியரசன் சொன்ன குட் நியூஸ்!
தமிழகத்தில் கோடை வெயில் சுட்டெரித்து வரும் நிலையில் மக்கள் இந்த வெக்கையிலிருந்து எப்படி தப்பிப்பது என எதிர்பார்த்து காத்திருக்கின்றனர்.
தென் மாவட்டங்களில் அவ்வப்போது மழை பெய்துவரும் நிலையில் சென்னை உள்ளிட்ட வட மாவட்டங்கள், மத்திய மாவட்டங்கள் அதிக வெப்பத்தை எதிர்கொண்டு வருகின்றன.
இந்நிலையில் அரபிக் கடலில் உருவாக உள்ள புதிய புயலால் இந்த வெக்கை போகாதா என்ற எதிர்பார்ப்பு ஏற்பட்டுள்ளது. அரபிக் கடலில் மே 14ஆம் தேதி காற்றழுத்த தாழ்வு நிலை உருவாக வாய்ப்புள்ளதாக இந்திய வானிலை ஆய்வு மையம் தெரிவித்துள்ளது. இது பின்னர் காற்றழுத்த தாழ்வு மண்டலமாக மாறும். அதன்பின்னர் மே 16ஆம் தேதி புயலாக மாறும் என கணிக்கப்பட்டுள்ளது.
அவ்வாறு புயல் உருவானால் அதற்கு தக்டே என பெயரிடப்படும். தக்டே என்பது மியான்மரில் ஒரு வகை பல்லி இனம் என்கிறார்கள். இந்த புயல் மணிக்கு 120 கிமீ வேகம் வரை செல்லும் என்று கணிக்கப்படுகிறது. குஜராத் , பாகிஸ்தான் அருகே கரையைக் கடக்க வாய்ப்புள்ளதாக சொல்லப்பட்டாலும் இப்போதே அதன் பாதையை முழுவதும் கணிக்க முடியாது என்று கூறுகிறார்கள் வானிலை ஆய்வாளர்கள்.
இந்த புயலால் தமிழகத்துக்கு என்ன பயன் என்று பார்த்தால், கேரள கரையோரம் புயல் வருமேயானால் தமிழகத்தில் மழை பெய்யும் என்று கணிக்கப்பட்டுள்ளது. மேற்கு தொடர்ச்சி மலையை ஒட்டிய தமிழக பரப்பில் மழை பெய்யலாம் என்று கூறப்படுகிறது. இந்த தாழ்வு நிலை காரணமாக அடுத்த இரு நாட்களுக்கு மேற்கு தொடர்ச்சி மலையை ஒட்டிய தமிழக பகுதிகளில் லேசான மழை பெய்ய வாய்ப்புள்ளது.
சென்னை வானிலை ஆய்வு மைய இயக்குநர் நா.புவியரசன் இது குறித்து கருத்து தெரிவித்துள்ளார். "தென்மேற்குத் திசையிலிருந்து தமிழகத்தை நோக்கி தரைக்காற்று வீசவில்லை. மாறாக, தென்கிழக்கு மற்றும் கிழக்கில் இருந்து காற்று வீசியது. இதுதவிர, தென்கிழக்கு அரபிக்கடலில் புதிய காற்றழுத்தத் தாழ்வுப்பகுதி உருவாகவுள்ளது. இதன்காரணமாக, தமிழகத்தின் பல மாவட்டங்களில் குறைவான வெப்பநிலையும், சில மாவட்டங்களில் இயல்பான வெப்பநிலையும் காணப்பட்டது. வரும் 5 நாள்களுக்கு வெப்பநிலை உயர வாய்ப்பில்லை” என்று புவியரசன் கூறியுள்ளார்.
No comments:
Post a Comment