ஸ்டெர்லைட் ஆலை ஆக்சிஜன்: விநியோகப் பணிகள் தொடக்கம்!
கொரோனாவால் பாதிக்கப்பட்டவர்களுக்கு ஆக்சிஜன் வழங்கப்படுவதும் மிக அத்தியாவசியமானதாக உள்ளது. நாடு முழுவதும் ஆக்சிஜன் பற்றாக்குறையால் தினம்தினம் உயிரிழப்புகள் அதிகரித்த வண்ணம் உள்ளன.
தூத்துக்குடியில் செயல்பட்டுவந்த ஸ்டெர்லைட் தாமிர ஆலையால் சுற்றுச்சூழல் மாசடைவதுடன் மக்களின் உடல்நிலையில் கடுமையான பாதிப்புகளை ஏற்படுத்துவதாக குற்றச்சாட்டு எழுந்தது. ஆலையை மூட நடைபெற்ற போராட்டத்தில் காவல்துறையினர் நடத்திய துப்பாக்கிச் சூட்டில் அப்பாவி மக்கள் 13பேர் கொல்லப்பட்டனர். அதன் பின்னர் ஆலையும் மூடப்பட்டது.
இந்நிலையில் துாத்துக்குடி ஸ்டெர்லைட் ஆலையை, ஆக்சிஜன் உற்பத்திக்காக மட்டும் திறக்க உச்ச நீதிமன்றம் அனுமதித்தது. உற்பத்திக்கு தேவையான மின்சாரம், குடிநீர் போன்றவற்றை தமிழக அரசு வழங்குகிறது. ஆலையின் வேறு அலகுகள் இயங்கக்கூடாது என கூறப்பட்டுள்ளது. தற்போது இந்த ஆக்சிஜன் உற்பத்தி பணியில், 320 பணியாளர்கள் ஈடுபட்டு வருகின்றனர்
சோதனை ஓட்டம் நிறைவடைந்து உற்பத்தி தொடங்கி தற்போது விநியோகப் பணிகளும் தொடங்கியுள்ளன.
கண்காணிப்பு குழு தலைவரும் , தூத்துக்குடி மாவட்ட ஆட்சியருமான செந்தில்ராஜ் ஆக்சிஜன் விநியோகத்தை தொடங்கி வைத்தார். ஆக்சிஜன் நிரப்பப்பட்ட முதல் லாரி போலீஸ் பாதுகாப்புடன் ஸ்டெர்லைட் ஆலையில் இருந்து புறப்பட்டது.
மாவட்ட ஆட்சித் தலைவர் கொடியசைத்து துவக்கி வைக்க 4.82 டன் ஆக்சிஜன் லாரி நெல்லை மருத்துவக்கல்லூரிக்கு புறப்பட்டது.
மத்திய அரசின் உத்தரவுப்படி முதல் கட்டமாக சென்னைக்கு 18 டன் ஆக்சிஜன் அனுப்பி வைக்கப்பட்டுள்ளது.
No comments:
Post a Comment