5 வருஷத்துக்கு நாங்கதான்.. சிவ சேனா தடாலடி!

5 வருஷத்துக்கு நாங்கதான்.. சிவ சேனா தடாலடி!

மகாராஷ்டிர மாநிலத்தில் மகா விகாஸ் அகாதி கூட்டணி ஆட்சி நடைபெற்று வருகிறது. இக்கூட்டணியில் சிவ சேனா, காங்கிரஸ், தேசியவாத காங்கிரஸ் ஆகிய கட்சிகள் இடம்பெற்றுள்ளன. சிவ சேனா தலைவர் உத்தவ் தாக்கரே முதல்வர் பதவி வகித்து வருகிறார்.

முதல்வர் பதவி வேண்டுமென மகாராஷ்டிர காங்கிரஸ் தலைவர் நானா படோல் ஆசைப்படுவதாக தகவல்கள் வெளியாகியுள்ளன. இந்நிலையில், முதல்வர் பதவியை பகிர்ந்துகொள்வது குறித்து சிவ சேனா பதிலளித்துள்ளது.

இந்நிலையில், ஐந்து ஆண்டுகளுக்கு சிவ சேனாவிடம் மட்டுமே முதல்வர் பதவி இருக்கும் என அக்கட்சியை சேர்ந்த சஞ்சய் ரவுத் தெரிவித்துள்ளார். அவர் செய்தியாளர்களிடம் பேசியபோது, “கூட்டணியில் சிவ சேனாவிடம் முதல்வர் பதவி ஐந்து ஆண்டுகளுக்கு இருக்கும்.

இதுவொரு கமிட்மண்ட். முதல்வர் பதவியை பங்கிடப்போவதில்லை. இதுகுறித்து பேச்சுவார்த்தை கூட நடத்த முடியாது. முதல்வர் பதவிக்கு ஆசைப்படுவது தவறில்லை. காங்கிரஸில் நாட்டையே வழிநடத்தக்கூடிய தலைவர்கள் இருக்கின்றனர்.

கொள்கை ரீதியாக முரண்பட்டாலும் நாங்கள் மூன்று கட்சிகளும் இணைந்து ஆட்சி அமைத்துள்ளோம். அனைத்து எதிர்க்கட்சிகளும் ஒன்றாக இணைந்து 2024ஆம் ஆண்டில் நரேந்திர மோடியை எதிர்த்து போட்டியிட்டால் என்ன தவறு?” என்று கேள்வியெழுப்பியுள்ளார்.