பாளையங்கோட்டை சிறை மோதலில் உயிரிழந்த முத்துமனோ குடும்பத்திற்கு ரூ.10 லட்சம் நிதி - முதல்வர்

பாளையங்கோட்டை சிறை மோதலில் உயிரிழந்த முத்துமனோ குடும்பத்திற்கு ரூ.10 லட்சம் நிதி - முதல்வர்

நெல்லை மாவட்டம் வாகைக்குளம் பகுதியைச் சேர்ந்தவர் முத்துமனோ. 27 வயதான முத்துமனோ மீது பல்வேறு வழக்குகள் நிலுவையில் இருந்ததாக கூறப்படுகிறது. இந்த நிலையில் கடந்த ஏப்ரலில் கைது செய்யப்பட்டு பாளையங்கோட்டை சிறையில் அடைக்கப்பட்டார். இந்நிலையில், சிறைக்குள் கைதிக்குள் இடையே ஏற்பட்ட மோதலில் முத்துமனோ கொலை செய்யப்பட்டதாக அதிர்ச்சி தகவல் வெளியாகியது.

இதையடுத்து, மகனின் மரணம் தொடர்பாக சிறைத்துறை அதிகாரிகள் மீதும் நடவடிக்கை எடுக்குமாறும், மகனின் இறப்பிற்கு 2 கோடி ரூபாய் நிதி வழங்கவேண்டும் எனக்கோரி அவரது தந்தை சென்னை உயர் நீதிமன்றத்தில் மனு தாக்கல் செய்தார்.

அந்த வழக்கு அண்மையில் விசாரணைக்கு வந்தபோது, முத்துமனோவின் உடலை இன்னும் உறவினர்கள் வாங்க மறுத்து, போராட்டத்தில் ஈடுபட்டு வருவதால் பாளையங்கோட்டையில் சட்டம் ஒழுங்கை குறித்து அறிக்கை தாக்கல் செய்ய மாவட்ட காவல்துறைக்கு நீதிமன்றம் உத்தரவிட்டது. மேலும், இந்த வழக்கு சிபிசிஐடி விசாரித்து வருகிறது.

இந்த நிலையில், பாளையங்கோட்டை சிறையில் நிகழ்ந்த மோதலில் உயிரிழந்த கைதி முத்துமனோ குடும்பத்திற்கு ரூ.10 லட்சம் நிதி வழங்கப்படும் என்று முதல்வர் ஸ்டாலின் தெரிவித்துள்ளார். இன்று அதுதொடர்பாக முதல்வர் வெளியிட்டுள்ள அறிக்கையில், ''சிறையில் நிகழ்ந்த மோதலில் உயிரிழந்த கைதி முத்துமனோ குடும்பத்திற்கு எனது ஆழ்ந்த இரங்கல்.

சிறையில் நிகழ்ந்த மோதல் தொடர்பாக பெருமாள்புரம் காவல் நிலையத்தில் வழக்குப்பதிவு செய்து விசாரணை நடத்தப்பட்டு வருகிறது. சம்பவத்திற்கு காரணமான பாளையங்கோட்டை சிறை பணியாளர்கள் 6 பேர் சஸ்பெண்ட் செய்யப்பட்டு உள்ளனர்'' என இவ்வாறு அதில் கூறப்பட்டுள்ளது.