பெண்களுக்காக பேருந்துகளில் அடுத்த சூப்பர் திட்டம்: விரைவில் அமல்!

பெண்களுக்காக பேருந்துகளில் அடுத்த சூப்பர் திட்டம்: விரைவில் அமல்!

தமிழக முதல்வராக ஸ்டாலின் பொறுப்பேற்ற பின் பல்வேறு நலத்திட்டங்களை செய்து வருகிறார். அதற்கு பொதுமக்கள் மத்தியில் வரவேற்பு கிடைத்துள்ளது. குறிப்பாக, அரசு பேருந்துகளில் பெண்களுக்கான இலவச பயணத் திட்டம் மிகுந்த வரவேற்பை பெற்றுள்ளது. இதனால், பேருந்துகளில் பயணிக்கும் பெண்களின் எண்ணிக்கை அதிகரித்துள்ளதுடன், அவர்களது சமூக முன்னேற்றதுக்கு பெரும் உதவியாக இருப்பதாகவும் கூறப்படுகிறது.

கடந்த மே 8 முதல் நகர பேருந்துகளில் பெண்கள் இலவசமாக பயணம் மேற்கொண்டு வந்தாலும், ஜூலை 12ஆம் தேதி முதல்தான் பெண்களுக்கு இலவச டிக்கெட் வழங்கப்பட்டு வருகிறது. அந்த வகையில், இதுவரை 78 லட்சம் பெண்கள் பயணம் மேற்கொண்டுள்ளதாக போக்குவரத்துத்துறை அமைச்சர் ராஜ கண்ணப்பன் தெரிவித்துள்ளார்.

தலைமை செயலகத்தில் செய்தியாளர்களைச் சந்தித்த அமைச்சர், இலவச பயணத்திட்டம் பெண்களிடம் நல்ல வரவேற்பைப் பெற்றுள்ளது. பெண் பயணிகளின் எண்ணிக்கை அதிகரிக்க, அதிகரிக்க பேருந்துகளின் எண்ணிக்கையும் அதிகரிக்கப்படும் என்றார். நிறுத்தப்பட்ட பேருந்து சேவைகள் படிப்படியாக மீண்டும் இயக்கப்படும். இது தொடர்பாக பொதுமக்களின் கோரிக்கைகள் நிறைவேற்றப்பட்டு வருவதாகவும் அவர் தெரிவித்துள்ளார்.

மேலும், பெண்களின் பாதுகாப்புக்காக நிர்பயா திட்டத்தின் கீழ் முதற்கட்டமாக சென்னையில் 2,500 பேருந்துகளில் 71 ரூபாய் கோடி செலவில் சிசிடிவி கேமராக்கள் பொருத்தும் பணி நடைபெற்று வருகிறது. விரைவில் இந்த திட்டம் நடைமுறைக்கு வரும் என்றும் அவர் அப்போது தகவல் தெரிவித்தார்.