அத்தைக்கு மீசை முளைக்குமா? கொங்கு நாடு குறித்து ஜெயக்குமார் ரியாக்‌ஷன்!

அத்தைக்கு மீசை முளைக்குமா? கொங்கு நாடு குறித்து ஜெயக்குமார் ரியாக்‌ஷன்!

பாஜக தலைவராக இருந்த எல்.முருகன் ஒன்றிய இணை அமைச்சராக பதவியேற்ற போது தன்னுடைய சுயவிவர குறிப்பில் கொங்கு நாடு - தமிழ்நாடு எனக் குறிப்பிட்டார்.அதுமுதல் பாஜக மற்றும் அதன் ஆதரவு அமைப்பைச் சேர்ந்தவர்கள் கொங்கு நாடு கோரிக்கையை முன்னெடுத்து வருகின்றனர். இதற்கு பல்வேறு கட்சிகளைச் சேர்ந்த தலைவர்கள் கண்டனம் தெரிவித்துள்ளனர்.

அதிமுக சார்பாக அக்கட்சியின் துணை ஒருங்கிணைப்பாளர் கே.பி.முனுசாமி எதிர்ப்பு தெரிவித்தார்.

இந்நிலையில், அதிமுக முன்னாள் அமைச்சர் ஜெயக்குமார், இன்று (ஜூலை 15) செய்தியாளர்களைச் சந்தித்தார். அப்போது அவரிடம் கொங்குநாடு விவகாரம் குறித்து செய்தியாளர்கள் கேள்வி எழுப்பினர். அதற்கு பதிலளித்த ஜெயக்குமார், "அத்தைக்கு மீசை முளைக்கட்டும். மற்ற விஷயங்களைப் பிறகு பார்க்கலாம்" என்றார்.

“காவிரி நதிநீர் என்பது ஜீவாதார உரிமை. டெல்டா மாவட்ட விவசாயிகளின் நலன். ஒட்டுமொத்த தமிழக மக்களின் நலன் என்ற வகையில், அதனை நிலைநாட்ட வேண்டும் என்பதனால்தான், முன்னாள் முதல்வர்கள் எம்ஜிஆரும் ஜெயலலிதாவும் கடந்த காலங்களில் போராடி, வாதாடி, அந்த உரிமையை நிலைநாட்டினர். எந்த நிலையிலும் நம் உரிமை பறிபோய்விடக் கூடாது.காவிரி பிரச்சினையில் தமிழகத்தின் உரிமையை விட்டுக்கொடுக்க முடியாது. அனைத்துக் கட்சிப் பிரதிநிதிகள் இன்று டெல்லி செல்கின்றனர். நாளை மத்திய ஜல்சக்தித் துறை அமைச்சரைச் சந்தித்து இதுகுறித்து வலியுறுத்துவோம்" என்று மேகதாது அணை விவகாரம் குறித்து பேசினார்.