இரவு ஊரடங்கு ரத்து: தியேட்டர்களுக்கு அனுமதி - அரசு அதிரடி அறிவிப்பு!
கொரோனா தொற்றின் இரண்டாவது அலையை கட்டுக்குள் கொண்டு வரும் பொருட்டு பல்வேறு மாநிலங்கள் ஊரடங்கு விதிகளை அமல்படுத்தின. அந்த வகையில், பஞ்சாப் மாநிலம் முழுவதும் கடந்த மே மாதம் முதல் பொதுமுடக்கம் அமல்படுத்தப்பட்டு வந்தது.
இந்த நிலையில், நாடு முழுவதும் கொரோனா தொற்று குறைந்து வருவதால், பல்வேறு தளர்வுகளை படிப்படியாக மாநில அரசுகள் அறிவித்து வருகின்றன. அதன்படி, பஞ்சாப் மாநிலத்தில் இரவு நேர மற்றும் வார இறுதி பொதுமுடக்கங்கள் ரத்து செய்யப்படுவதாக அறிவிக்கப்பட்டுள்ளது.
மேலும், திரையரங்குகள், மதுபானக் கூடம், உணவகம், சலூன், உடற்பயிற்சி கூடங்கள் உள்பட அனைத்தும் செயல்பட கட்டுப்பாடுகளுடன் அனுமதி அளிக்கப்பட்டுள்ளது. ஆனால், பணியாளர்கள் மற்றும் வாடிக்கையாளர்கள் குறைந்தது ஒரு தவணை தடுப்பூசி செலுத்தப்பட்டிருந்தால் மட்டுமே அனுமதிக்க வேண்டும் என்ற கட்டுப்பாடுகளும் விதிக்கப்பட்டுள்ளன.
அதேபோல், உள்ளரங்கில் 100 பேர் மற்றும் வெளியரங்கில் 200 பேருடன் நிகழ்ச்சிகளை நடத்திக் கொள்ளவும் பஞ்சாப் மாநில அரசு அனுமதி அளித்துள்ளது. இதனால், அம்மாநில மக்கள் மகிழ்ச்சியடைந்துள்ளனர். தளர்வுகளை பொதுமக்கள் சரியாக பயன்படுத்த வேண்டும். தேவையின்றி வெளியே சுற்றுவதை தவிர்க்க வேண்டும். வெளியில் செல்லும் போது முகக்கவசம் கட்டாயம் அணிய வேண்டும். தடுப்பூசியை செலுத்திக் கொள்ள வேண்டும் என்றும் அம்மாநில அரசு அறிவுறுத்தியுள்ளது.
No comments:
Post a Comment