பள்ளிகள் திறப்பு: 2021-22 ஆம் ஆண்டின் முக்கிய அறிவிப்பை வெளியிட்ட அமைச்சர்

பள்ளிகள் திறப்பு: 2021-22 ஆம் ஆண்டின் முக்கிய அறிவிப்பை வெளியிட்ட அமைச்சர்

தமிழகத்தில் செப்டம்பர் 1 முதல் 9 முதல் 12ம் வகுப்புகள் வரை பள்ளிகள் மீண்டும் திறக்கப்படவுள்ளன. இந்நிலையில் மாநிலம் முழுவதும் உள்ள ஒவ்வொரு பள்ளியும் மாணவர்களின் பாதுகாப்பு மற்றும் நல்வாழ்வை கண்காணிக்க "மாணவர் பாதுகாப்பு ஆலோசனைக் குழுவை" அமைக்க வேண்டும் என்று அமைச்சர் அன்பில் மகேஷ் தெரிவித்துள்ளார்.

ஏற்கனவே சட்டசபையில் பல அறிவிப்புகளை வெளியிடும் போதே அமைச்சர் இதுகுறித்து பேசியுள்ளார். சில வாரங்களுக்கு முன் நடந்த பட்ஜெட் கூட்டத்தொடரின் போது, தமிழக அரசு பள்ளிக்கல்விக்காக தனது அதிகபட்ச பட்ஜெட் ஒதுக்கீடான ரூ .32,599 கோடியை வழங்கியது. மேலும், 2021-22 ஆம் ஆண்டுக்கான தொடக்கநிலைக்கு ரூ .16,080.96 கோடி மற்றும் நடுநிலை மற்றும் மேல்நிலைக் கல்விக்கு ரூ .15,650.34 கோடி பட்ஜெட் ஒதுக்கீடு செய்யப்பட்டுள்ளது.

மாணவர் பாதுகாப்பு ஆலோசனைக் குழுவை பற்றி பேசிய அமைச்சர், புகார்களைப் பெற கட்டணமில்லா தொலைபேசி எண் மற்றும் பிரத்யேக மின்னஞ்சல் வசதியுடன் கட்டுப்பாட்டு அறை அமைக்கப்படும் என்றார். மேலும், பள்ளிகளில் போஸ்கோ சட்டம் குறித்த விழிப்புணர்வை ஏற்படுத்தவும் பள்ளிகளில் பாதுகாப்பை மேம்படுத்தவும் நடவடிக்கை எடுக்கப்படும் எனவும் தெரிவித்தார்.

அத்துடன், பள்ளி வளாகத்தில் மாணவர்கள் தங்கள் புகார்களைத் தெரிவிக்க வசதியாகவும் கருத்துக்களைப் பெறவும் பாதுகாப்புப் பெட்டிகள் வைக்கப்பட வேண்டும். குழந்தைகள் வன்கொடுமை தடுப்பு வாரம் ஒவ்வொரு ஆண்டும் நவம்பர் 15 முதல் 22 வரை அனைத்து பள்ளிகளிலும் கடைபிடிக்கப்பட வேண்டும் என்றும் அமைச்சர் உத்தரவிட்டுள்ளார்.

மேலும், மாணவர்களுக்கு தகவல் மற்றும் வழிகாட்டுதல்களை வழங்குவதற்காக டிபிஐ வளாகத்தில் 5 இருக்கைகள் கொண்ட 24 × 7 கட்டணமில்லா ஹெல்ப்லைன் அமைக்கப்பட்டுள்ளதாக அன்பில் மகேஷ் கூறினார். இது மாநிலம் முழுவதும் உள்ள மாணவர்கள், ஆசிரியர்கள் மற்றும் பெற்றோர்களின் குறைகளை நிவர்த்தி செய்ய ஒரு ஒற்றை மைய புள்ளி தொடர்பு என்றும் இந்த ஹெல்ப்லைனில் இதுவரை 3.5 லட்சம் அழைப்புகள் வந்துள்ளதாகவும் அவர் கூறினார்.

தமிழகத்தில் உள்ள 1,784 அரசு நடுநிலைப் பள்ளிகளுக்கு ரூ .114 கோடி செலவில் உயர் தொழில்நுட்ப ஆய்வகங்களை வழங்க பள்ளிக் கல்வித்துறை திட்டமிடப்பட்டுள்ளதாக கூறும் அமைச்சர் 865 அரசு மேல்நிலைப் பள்ளிகளில் ஸ்மார்ட் வகுப்பறைகளை நிறுவுவதற்காக 2021-22 ஆம் ஆண்டிற்கு ரூ. 20.76 கோடி ஒதுக்கப்பட்டுள்ளது என்றும் தெரிவித்தார்.