பழசையெல்லாம் மறந்துட்டு விஜயகாந்துக்கு ஸ்டாலின் பிறந்தநாள் வாழ்த்து!

பழசையெல்லாம் மறந்துட்டு விஜயகாந்துக்கு ஸ்டாலின் பிறந்தநாள் வாழ்த்து!

தேமுதிக தலைவர் விஜயகாந்த் இன்று தமது 69 ஆவது பிறந்த நாளை இன்று கொண்டாடுகிறார். இதனையொட்டி அரசியல் கட்சி தலைவர்கள், திரை நட்சத்திரங்கள், முக்கிய பிரமுகர்கள் என்று பல்வேறு தரப்பினரும் அவருக்கு பிறந்த நாள் வாழ்த்து தெரிவித்து வருகின்றனர்.

முக்கியமாக, திமுக தலைவரும், தமிழக முதல்வருமான மு.க.ஸ்டாலின் விஜயகாந்துக்கு பிறந்த நாள் வாழ்த்து தெரிவித்துள்ளார்.

இதுகுறித்து அவர் வெளியிட்டுள்ள ட்விட்டர் பதிவில், "தே.மு.தி.க. நிறுவனரும், தமிழ் மக்களின் அன்புக்குரிய கதாநாயகருமான நண்பர் கேப்டன் @iVijayakant அவர்கள் நீண்ட நாட்கள் உடல்நலத்துடனும் மகிழ்ச்சியுடனும் வாழ அவரது பிறந்தநாளில் எனது வாழ்த்துகளைத் தெரிவித்துக் கொள்கிறேன்" என்று குறிப்பிட்டுள்ளார்.

ஸ்டாலினை போன்றே, உதயநிதி ஸ்டாலினும் விஜயகாந்துக்கு பிறந்த நாள் வாழ்த்து தெரிவித்துள்ளார். இதுதொடர்பாக தமது ட்விட்டர் பக்கத்தில் வீடியோ பதிவை அவர் வெளியிட்டுள்ளார்.

அதில், "திரையுலகம்-அரசியல் என தனிமுத்திரை பதித்தவர்- கலைஞரின் அன்பிற்குரியவர் - கழக தலைவரின் நண்பர் - மிக முக்கிய ஆளுமை அண்ணன் கேப்டன் அவர்களுக்கு இனிய பிறந்த நாள் வாழ்த்துகள். கேப்டன் அவர்கள் முழு ஆரோக்கியத்துடன் மக்கள் பணியாற்ற எனது விருப்பத்தையும்- வாழ்த்தையும் தெரிவித்துக்கொள்கிறேன்" என தெரிவித்துள்ளார்.

திமுகவும், தேமுதிகவும் கடந்த காலங்களில் அரசியல் அரங்கில் எலியும், பூனையுமாக இருந்துள்ளன. குறிப்பாக, கடந்த 2016 சட்டமன்ற தேர்தலில் தேமுதிக தலைமையில் அமைந்த மக்கள் நல கூட்டணிதான், திமுக தோல்விக்கு முக்கிய காரணம் என கூறப்பட்டது.

ஆனாலும் பழசையெல்லாம் மறந்துவிட்டு, ஸ்டாலினும், உதயநிதி ஸ்டாலினும் விஜயகாந்துக்கு பிறந்த நாள் வாழ்த்து தெரிவித்துள்ளது தமிழக அரசியல் அரங்கில் பல்வேறு கேள்விகளை எழுப்பியுள்ளது.