மருத்துவ கல்லூரிகளில் மாணவர் சேர்க்கை எப்போது? - அமைச்சர் மா.சுப்ரமணியன் தகவல்!

மருத்துவ கல்லூரிகளில் மாணவர் சேர்க்கை எப்போது? - அமைச்சர் மா.சுப்ரமணியன் தகவல்!

சென்னை கலைவாணர் அரங்கில் உள்ள தமிழக சட்டப்பேரவையில் பட்ஜெட் கூட்டத்தொடர் நடைபெற்று வருகிறது. கடந்த இரண்டு நாட்களாக பட்ஜெட் அறிவிப்பு மீதான பொது விவாதம் சட்டப்பேரவையில் நடைபெற்று வருகிறது.

இந்நிலையில் இன்று, புதிதாகத் தொடங்கப்பட்ட 11 மருத்துவக் கல்லூரிகளில் கூடுதல் இடங்களை உருவாக்க வேண்டும். கல்லூரி மாணவர் சேர்க்கை இந்த ஆண்டு தொடங்குமா? என்று, அ.தி.மு.க., சட்டப்பேரவை உறுப்பினர் ராஜன் செல்லப்பா கேள்வி எழுப்பினார்.

இதற்கு பதிலளித்த மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்ரமணியன், கடந்த 3 மாதங்களில் 11 மருத்துவக் கல்லூரிகளின் கட்டுமானப் பணிகளை ஆய்வு செய்து வருகிறோம். இது தொடர்பாக மத்திய அரசிடம் அனுமதி கேட்டிருக்கிறோம்.

ஒரு கல்லூரிக்கு 150 மாணவர்கள் என்ற அடிப்படையில் இந்த ஆண்டே 1,650 மாணவர்களின் சேர்க்கைக்கு மத்திய அரசிடம் கோரிக்கை விடுத்துள்ளோம். அனுமதி கிடைத்தவுடன் மருத்துவக் கல்லூரி மாணவர் சேர்க்கை இந்த ஆண்டே தொடங்கும் என்று எதிர்பார்க்கிறோம் என்று தெரிவித்தார்.