பள்ளிகள் திறப்பு: அனைத்து ஏற்பாடுகளும் தயார்: ஆலோசனையில் அமைச்சர்!

பள்ளிகள் திறப்பு: அனைத்து ஏற்பாடுகளும் தயார்: ஆலோசனையில் அமைச்சர்!

தமிழ்நாட்டில் கொரோனா பரவல் காரணமாக கடந்த ஆண்டு மார்ச் மாதம் முதல் பள்ளிகள் மூடப்பட்டுள்ளன. கொரோனா பரவலில் முதல் அலை கொஞ்சம் மட்டுப்படுத்தப்பட்ட போது சில நாள்கள் குறிப்பிட்ட வகுப்புகளுக்கு பள்ளிகள் திறக்கப்பட்டது. பின்னர் மீண்டும் கொரோனா அதிகரித்ததால் பள்ளிகள் மூடப்பட்டன.

இந்நிலையில் செப்டம்பர் 1ஆம் தேதி முதல் 9 முதல் 12ஆம் வகுப்பு மாணவர்களுக்கு நேரடி வகுப்புகளைத் தொடங்க அரசு திட்டமிட்டுள்ளது. அதற்காக பள்ளிகளை தயார் செய்யும் பணிகள் தொடங்கி நடைபெற்றன. பள்ளிகளுக்கு அனைத்து ஆசிரியர்களும் தினம் தோறும் சென்று வருகின்றன. பள்ளிகள் திறக்கப்படுவதற்கு முன்னர் அனைத்து பள்ளிகளிலும் ஆசிரியர்கள், பணியாளர்களுக்கு தடுப்பூசி செலுத்தப்பட உள்ளது.இந்நிலையில் சென்னை கோட்டூர்புரத்தில் உள்ள அண்ணா நூற்றாண்டு நினைவு நூலகத்தில் உள்ள அரங்கில் பள்ளிக் கல்வித்துறை ஆணையர் நந்தகுமார் தலைமையில் அரசு தேர்வுகள் துறை அதிகாரிகளுடன் ஆலோசனை நடைபெற்றது. ஆகஸ்ட் மாதத்தில் நடைபெற்ற துணைத் தேர்வின் விடைத்தாள் மதிப்பீட்டு பணியினை குறிப்பிட்ட காலத்துக்குள் முடிக்க அறிவுறுத்தப்பட்டுள்ளதாக கூறப்படுகிறது.

மெட்ரிகுலேஷன் பள்ளிகள் இயக்ககம், பள்ளி சாரா மற்றும் வயது வந்தோர் கல்வி இயக்கக அதிகாரிகள் மற்றும் மாவட்ட முதன்மைக் கல்வி அலுவலர்களுடனும் ஆலோசனை நடைபெறுகிறது.