பள்ளிகள் திறப்பு: முதல்வர் ஸ்டாலின் நாளை ஆலோசனை!

பள்ளிகள் திறப்பு: முதல்வர் ஸ்டாலின் நாளை ஆலோசனை!

தமிழகத்தில், வரும் செப்டம்பர் மாதம் 1ம் தேதி முதல் பள்ளிகள் திறக்கப்பட உள்ள நிலையில், முதலமைச்சர் மு.க.ஸ்டாலின் நாளை முக்கிய ஆலோசனை நடத்த உள்ளார்.

தமிழகத்தில் கொரோனா வைரஸ் தொற்றின் இரண்டாவது அலை கடும் பாதிப்பை ஏற்படுத்தியது. இதனால் கடந்த ஜனவரி மாதம் முதல் தமிழகத்தில் பள்ளி, கல்லூரிகள் மூடப்பட்டுள்ளன. இந்நிலையில் கடந்த சில நாட்களாக தமிழகத்தில் கொரோனா பாதிப்பு குறைந்து வருகிறது. இதை அடுத்து வரும் செப்டம்பர் மாதம் 1ம் தேதி முதல் பள்ளி, கல்லூரிகளை திறக்க தமிழக அரசு முடிவு செய்துள்ளது.

முதல் கட்டமாக 9 முதல் 12ம் வகுப்பு வரைக்கும், செப்டம்பா் மாதம் 15ம் தேதிக்குப் பின் பிற வகுப்புகளுக்கும் பள்ளி செயல்பாடு துவங்க உத்தரவிடப்பட்டுள்ளது. அதற்காக பள்ளிகள் மற்றும் கல்லூரிகள் ஆயத்தமாகி வருகின்றன.

செப்டம்பர் மாதம் 1ம் தேதி முதல் பள்ளி, கல்லூரிகள் திறக்கப்பட உள்ள நிலையில் சுகாதாரத் துறை மற்றும் காவல் துறை அதிகாரிகளுடன், தி.மு.க., தலைவரும், முதலமைச்சருமான மு.க.ஸ்டாலின், சென்னை தலைமை செயலகத்தில் நாளை முக்கிய ஆலோசனை நடத்த உள்ளார். அப்போது பள்ளி, கல்லூரிகள் திறப்பு தொடர்பான எடுக்கப்பட்டுள்ள முன்னெச்சரிக்கை நடடிவக்கைகள் குறித்து அவர் ஆலோசிக்கலாம் எனக் கூறப்படுகிறது.