ஆ முக்கிய மந்திரி இண்ட பெயர் மு.க.ஸ்டாலின்: கேரளாவில் ட்ரெண்டாகும் தமிழக முதல்வர்!

ஆ முக்கிய மந்திரி இண்ட பெயர் மு.க.ஸ்டாலின்: கேரளாவில் ட்ரெண்டாகும் தமிழக முதல்வர்!

தமிழ்நாட்டில் நடந்து முடிந்த சட்டமன்றத் தேர்தலில் வெற்று பெற்று திமுக ஆட்சியை பிடித்துள்ளது. திமுக தலைவர் ஸ்டாலின் கடந்த மே மாதம் 7ஆம் தேதி முதல்வராக பொறுப்பேற்றார். அன்று முதல் முதல்வராக ஸ்டாலின் மேற்கொண்டு வரும் நடவடிக்கைகள் பலராலும் பாராட்டப்பட்டு வருகிறது.

குறிப்பாக, கொரோனா தடுப்பு பணிகளில் அவர் காட்டிய தீவிரம், பேருந்துகளில் பெண்களுக்கு இலவச பயணம், அரிசி ரேசன் அட்டைதாரர்களுக்கு கொரோனா நிவாரண நிதியாக ரூ.4000 வழங்கியது, பெட்ரோல் விலை ரூ.3 குறைப்பு என்பன உள்ளிட்ட பல்வேறு நடவடிக்கைகள் அனைவர் மத்தியிலும் வரவேற்பை பெற்றுள்ளது.

கடந்த ஆட்சி காலத்தில் திமுக மீது வைக்கப்பட்ட குற்றச்சாட்டுகள் இந்த முறை வந்து விடக் கூடாது என்பதிலும் அவர் கவனமாக இருக்கிறார். திமுக அரசு அனைவருக்குமானதாக இருக்கும். தங்களுக்கு வாக்களிக்காதவர்களும் வருந்தும் வகையில், அரசின் செயல்பாடுகள் இருக்கும் என்றும் அவர் ஏற்கனவே தெரிவித்துள்ளார்.

இந்த நிலையில், கேரள மாநில ஊடகம் ஒன்றில் நடைபெற்ற விவாதத்தில் கலந்து கொண்ட அம்மாநில எதிர்க்கட்சியான காங்கிரஸ் எம்.எல்.ஏ. விஷ்னுநாத், மூன்று மாதங்களில் என்னவெல்லாம் மக்களுக்கு செய்ய முடியும் என நிரூபித்தவர் ஸ்டாலின் என தமிழக முதல்வர் ஸ்டாலினை புகழ்ந்து பேசும் வீடியோ வைரலாகி வருகிறது.

அதில் பேசும் அவர், “2 கோடி குடும்பங்களுக்கு நிவாரணமாக ரூ.4000, 14 வகை மளிகைப்பொருட்கள், மருத்துவர்களுக்கு 30,000, செவிலியர்களுக்கு ரூ.20,000 மற்ற மருத்துவப் பணியாளருக்கு 15,000 ஊக்கத்தொகை, மகளிருக்கு இலவச பேருந்துப் பயணம் என ஸ்டாலினின் செயல்களை பட்டியலிட்டு, இவையெல்லாம் கொடுத்த முதல் மந்திரி பினராயி விஜயன் அல்ல. மு.க. ஸ்டாலின் என்கிறார். அத்துடன், ஸ்டாலின் செய்த மாற்றங்கள் மற்றும் கேரள மாடல் ஏன் தோல்வியடந்தது என்பது குறித்தும் காங்கிரஸ் எம்.எல்.ஏ. விஷ்னுநாத் அந்த விவாதத்தின் போது விளக்கையுள்ளார்.திமுக அரசு தேர்தல் அறிக்கையில் கூறியதை நிறைவேற்றவில்லை. 100 நாட்களை கடந்தும் எதுவுமே செய்யவில்லை என்று தமிழ்நாட்டில் உள்ள அதிமுக உள்ளிட்ட சில அரசியல் கட்சிகள் தொடர்ந்து குற்றச்சாட்டை முன்வைத்து வரும் நிலையில், கேரள அரசியல் களத்தில் ஸ்டாலின் மேற்கொண்ட நடவடிக்கைகள் பலராலும் பேசப்பட்டு வருகிறது என்பது குறிப்பிடத்தக்கது.