செப்டம்பர் 17 சமூகநீதி நாள்: ராமதாஸ் வரவேற்பு..!
தமிழக சட்டசபையில் பல்வேறு துறைகளின் மீதான மானிய கோரிக்கை விவாதம் நடந்து வருகிறது. இந்த நிலையில், முதல்வர் ஸ்டாலின் தந்தை பெரியாரின் பிறந்தநாளான செப்டம்பர் 17 அன்று சமூக நீதி நாளாக அறிவிக்கப்படும் என்றும் தலைமை செயலகம், அனைத்து அரசு அலுவலகங்களிலும் உறுதி மொழி ஏற்கப்படும் என்று கூறினார்.
மேலும், இந்தியா முழுவதும் சமூக நீதி பற்றிய பார்வை உருவாக பெரியார் அடித்தளம் அமைத்தவர் என்றும் பெரியாரின் போராட்டங்கள் குறித்து பேசுவது என்றால் அவையை பத்து நாட்கள் ஒத்திவைத்து பேச வேண்டும் என்றும் புகழ்ந்து பேசினார். இந்நிலையில் முதல்வரின் அறிவிப்பை வரவேற்றுள்ள பாமக நிறுவனர் ராமதாஸ் ட்விட்டரில் வாழ்த்து தெரிவித்துள்ளார்.
அதுகுறித்து அவர் பதிவில், ''பெரியாரின் பிறந்த நாளான செப்டம்பர் 17-ம் தேதி தமிழகத்தில் சமூக நீதி நாளாகக் கடைப்பிடிக்கப்படும் என்று தமிழக முதல்வர் மு.க.ஸ்டாலின் அறிவித்திருக்கிறார். சமூக நீதி குறித்து விழிப்புணர்வு ஏற்படுத்துவதற்கான இந்த நடவடிக்கை வரவேற்கத்தக்கது!1987-ம் ஆண்டு பெரியாரின் பிறந்த நாளான செப்டம்பர் 17-ம் நாள்தான் சமூக நீதி கேட்டு ஒரு வார தொடர் சாலை மறியல் போராட்டத்தைத் தொடங்கினோம். அந்த நாளில்தான் சமூக நீதிக்காகப் போராடிய மாவீரர்கள் சுட்டுக் கொல்லப்பட்டனர்.
பெரியாரின் பிறந்த நாளை சமூக நீதி நாளாக அறிவிக்க வேண்டும் என்று பாமக தொடர்ந்து வலியுறுத்தி வந்தது. தேர்தல் அறிக்கைகளிலும் வாக்குறுதி அளித்து வந்தது. பாமக சமூக நீதி நாள் கோரிக்கையைத் தமிழக அரசு நிறைவேற்றியிருப்பதில் மகிழ்ச்சி'' என இவ்வாறு கூறியுள்ளார்.
No comments:
Post a Comment