மாணவர்களுக்கு கொரோனா: கோவையில் மூடப்பட்ட கல்லூரி!

மாணவர்களுக்கு கொரோனா: கோவையில் மூடப்பட்ட கல்லூரி!

கொரோனா காரணமாக தமிழகத்தில் மூடப்பட்டிருந்த கல்லூரிகள் மீண்டும் திறக்கப்பட்டுள்ளன. கல்லூரிகளை திறப்பதற்கான வழிகாட்டு நெறிமுறைகளை அடிப்படையில் சுழற்சி முறையில் வகுப்புகள் நடைபெற்று வருகின்றன. இதனிடையே, கல்லூரி சென்ற மாணவர்கள், ஆசிரியர்கள் சிலருக்கு கொரோனா தொற்று ஏற்பட்டு வருவது பெரும் அச்சத்தை ஏற்படுத்தி வருகிறது. கொரோனா தொற்று அறிகுறிகள் தெரிந்தால், மாணவர்கள், ஆசிரியர்கள் கல்லூரிகளுக்கு வர வேண்டாம் என்ற அறிவுறுத்தல்களும் விடுக்கப்பட்டுள்ளன.

இந்த நிலையில், கோவை அவினாசி சாலையில் செயல்பட்டு வரும் கோவை தொழில்நுட்ப கல்லூரி மாணவ - மாணவிகளுக்கு கடந்த சில நாட்களுக்கு முன்பு கொரோனா பரிசோதனை செய்யப்பட்டது. இதில் முதற்கட்டமாக ஒரு மாணவி உட்பட 6 பேருக்கு கொரோனா உறுதி செய்யப்பட்டது.

அதன் தொடர்ச்சியாக, அவர்களுடன் தொடர்பில் இருந்த 100 க்கும் மேற்பட்டோருக்கு கொரோனா பரிசோதனை மேற்கொள்ளப்பட்டது. அதில் மேலும் 10 பேருக்கு கொரோனா தொற்று உறுதி செய்யப்பட்டுள்ளது. தொற்று உறுதியான அனைவரும் கோவை அரசு மருத்துவமனை மற்றும் இஎஸ்ஐ மருத்துவமனையில் சிகிச்சைக்காக அனுமதிக்கப்பட்டுள்ளனர்.

கல்லூரியில் மொத்தமாக 16 மாணவ, மாணவிகளுக்கு கொரோனா தொற்று உறுதி செய்யப்பட்டுள்ளதால், கல்லூரிக்கு விடுமுறை அளிக்கப்பட்டு மூடப்பட்டுள்ளது. இதையடுத்து, முன்னெச்சரிக்கை நடவடிக்கையாக கல்லூரி வளாகம் மற்றும் வகுப்பறைகளில் கிருமி நாசினி தெளித்து சுத்தம் செய்யப்பட்டது.