டெல்லி செல்லும் தமிழக ஆளுநர்: இதுக்குத்தான் ஆலோசனை செய்தாரா?

டெல்லி செல்லும் தமிழக ஆளுநர்: இதுக்குத்தான் ஆலோசனை செய்தாரா?

தமிழக ஆளுநராக பதவி வகித்த பன்வாரிலால் புரோஹித் பஞ்சாப் மாநிலத்துக்கு மாற்றப்பட்ட நிலையில் நாகலாந்து ஆளுநர் ஆர்.என்.ரவி தமிழ்நாட்டுக்கு நியமிக்கப்பட்டார். கடந்த 18ஆம் தேதியன்று ராஜ்பவனில் நடைபெற்ற விழாவில் ஆர்.என்.ரவிக்கு தலைமை நீதிபதி பதவிப்பிரமாணம் செய்து வைத்தார்.

பாஜக அரசு மத்தியில் பொறுப்பேற்றது முதலே தாங்கள் ஆட்சியில் இல்லாத மாநிலங்களில் ஆளுநர்களை வைத்து குடைச்சல் கொடுத்து வருவதாக குற்றம் சாட்டப்படுகிறது. அண்டை மாநிலமான புதுச்சேரி, டெல்லி ஆகியவை இதற்கு உதராணமாகவும் சுட்டிக்காட்டப்படுகிறது.

அந்த வகையில், காவல்துறை பின்புலம் கொண்ட ஆர்.என்.ரவி ஆளுநராக நியமிக்கப்பட்டதுமே அதற்கு முதல் ஆளாய் காங்கிரஸ் தலைவர் கே.எஸ்.அழகிரி எதிர்ப்பு தெரிவித்தார். விசிக தலைவர் திருமாவளவனும் தனது எதிர்ப்பை பதிவு செய்தார். ஒருவேளை ஆளுநரை வைத்து அரசியல் செய்ய நினைத்தால் அதற்கான விளைவுகளை பாஜக சந்திக்க நேரிடும் என்ற எச்சரிக்கைகளையும் அரசியல் கட்சிகள் விடுத்து வருகின்றன.

இந்த நிலையில், தமிழக ஆளுநராக பொறுப்பேற்றதும் முதல் முறையாக ஆர்.என்.ரவி நாளை டெல்லி செல்லவுள்ளதாக தகவலகள் வெளியாகியுள்ளன. இந்த பயணத்தின்போது, குடியரசுத் தலைவர் மற்றும் உள்துறை அமைச்சரை சந்தித்து அவர் பேச உள்ளதாக தெரிகிறது. முன்னதாக, காவல் துறை உயர் அதிகாரிகளை அழைத்து ஆர்.என்.ரவி ஆலோசனை நடத்திய நிலையில், அவரது டெல்லி பயணம் முக்கியத்துவம் வாய்ந்ததாக பார்க்கப்படுகிறது.