ஊழியர்களுக்கு ஒருநாள் விடுமுறை; அரசின் மகிழ்ச்சி அறிவிப்பு!

ஊழியர்களுக்கு ஒருநாள் விடுமுறை; அரசின் மகிழ்ச்சி அறிவிப்பு!

தமிழகத்தில் கொரோனா வைரஸ் பரவலைத் தடுக்கும் வகையில் தடுப்பூசி போடும் பணிகள் முடுக்கி விடப்பட்டுள்ளன. 18 வயதுக்கு மேற்பட்ட தகுதி வாய்ந்த நபர்களில் 42.5 சதவீதம் பேர் குறைந்தது ஒரு டோஸ் தடுப்பூசி போட்டுக் கொண்டனர். 11.1 சதவீதம் பேர் இரண்டு டோஸ் தடுப்பூசியும் போட்டிருக்கின்றனர். கடுமையான ஊரடங்கு கட்டுப்பாடுகளும், தடுப்பூசி முகாம்களின் தீவிர செயல்பாட்டாலும் நோய்த்தொற்றின் சீற்றம் பெரிதும் தணிந்திருக்கிறது. மாநிலத்தின் தினசரி தொற்று 1,700க்கும் கீழ் குறைந்துள்ளது. சென்னை, கோயம்புத்தூர், செங்கல்பட்டு, ஈரோடு ஆகிய மாவட்டங்களில் மட்டும் மூன்று இலக்க எண்ணிக்கையில் பாதிப்புகள் ஆட்டம் காட்டி வருகின்றன. இதனால் மொத்த பாதிப்பு சற்றே ஏற்றம் கண்டு வருகிறது. நேற்றைய தினம் புதிய பாதிப்புகள் 1,658ஆக பதிவாகியிருக்கிறது.

கொரோனா பாதிப்பு நிலவரம்

1,542 பேர் குணமாகி வீடு திரும்பியுள்ளனர். 29 பேர் பலியாகி இருக்கின்றனர். தற்போது கொரோனா நோயாளிகளாக 16,636 பேர் சிகிச்சை பெற்று வருகின்றனர். நேற்று 1,50,740 பேருக்கு கொரோனா பரிசோதனை செய்யப்பட்டுள்ளது. 3,55,766 டோஸ் தடுப்பூசிகள் போடப்பட்டுள்ளன. மாநிலத்தின் கொரோனா பாசிடிவ் விகிதம் 1.1 சதவீதமாக காணப்படுகிறது. கொரோனா பரவலின் மூன்றாவது அலை வருவதற்குள் அனைத்து முன்னெச்சரிக்கை நடவடிக்கைகளையும் எடுக்க வேண்டிய கட்டாயத்தில் தமிழக அரசு உள்ளது. இதையொட்டி விடுமுறை நாளான கடந்த 12ஆம் தேதி மாபெரும் தடுப்பூசி முகாம் நடத்தப்பட்டது.

மெகா தடுப்பூசி முகாம்

40 ஆயிரம் முகாம்கள் மூலம் 28.36 லட்சம் பேருக்கு தடுப்பூசி செலுத்தப்பட்டு சாதனை படைக்கப்பட்டது. அன்றைய தினம் 20 லட்சம் பேருக்கு தடுப்பூசி போட இலக்கு நிர்ணயம் செய்யப்பட்டிருந்தது குறிப்பிடத்தக்கது. அடுத்ததாக வரும் 17ஆம் தேதி மீண்டும் மெகா தடுப்பூசி முகாம் நடைபெறும் என்று அறிவிக்கப்பட்டிருந்தது. ஆனால் தடுப்பூசி தட்டுப்பாடு காரணமாக வரும் 19ஆம் தேதிக்கு மாற்றம் செய்யப்பட்டுள்ளது. அன்றைய தினம் காலை 7 மணி முதல் இரவு 7 மணி வரை தடுப்பூசி போடப்படும் என்று தெரிவிக்கப்பட்டுள்ளது.