ஊரக உள்ளாட்சித் தேர்தல்: வேலூரில் திமுக கூட்டணி பங்கீடு அறிவிப்பு!

ஊரக உள்ளாட்சித் தேர்தல்: வேலூரில் திமுக கூட்டணி பங்கீடு அறிவிப்பு!

தமிழகத்தில் விடுபட்ட நெல்லை தென்காசி, காஞ்சிபுரம், செங்கல்பட்டு, விழுப்புரம், கள்ளக்குறிச்சி, வேலூர், திருப்பத்தூர், ராணிப்பேட்டை ஆகிய 9 மாவட்ட ஊரக உள்ளாட்சிகளுக்கு அக்டோபர் 6, 9 ஆகிய தேதிகளில் இரண்டு கட்டங்களாக தேர்தல் நடைபெறவுள்ளது. இதற்கான அறிவிப்பை அறிவிப்பை மாநில தேர்தல் ஆணையம் வெளியிட்டுள்ளது.

இதையடுத்து, கூட்டணி பங்கீடு, விருப்ப மனு பெறுதல் உள்ளிட்ட பணிகளை அரசியல் கட்சிகள் மேற்கொண்டு வருகின்றன. பாமக, நாம் தமிழர், தேமுதிக ஆகிய கட்சிகள் தனித்து போட்டியிடுவதாக அறிவித்துள்ளன. திமுக கூட்டணி கட்சிகள் அக்கூட்டணியிலேயே தொடர்கிறது.

இந்த நிலையில், வேலூர் மாவட்டத்தில் போட்டியிடும் திமுக கூட்டணியின் இடப்பங்கீடு அறிவிக்கப்பட்டுள்ளது. இதற்கான பட்டியலை திமுக பொதுச்செயலாளர் துரைமுருகன் அறிவித்துள்ளார்.அதன்படி, வேலூர் மாவட்டத்தில் உள்ள ஏழு ஒன்றியங்களில் உள்ள 14 மாவட்ட கவுன்சிலர் பதவிகளில் காங்கிரஸ் கட்சிக்கு ஒரு இடம் ஒதுக்கப்பட்டுள்ளது. மீதமுள்ள 13 இடங்களில் திமுக போட்டியிடுகிறது.

மாவட்டத்தில் உள்ள 7 ஒன்றியங்களிலும் மொத்தம் 138 ஊராட்சி ஒன்றிய கவுன்சிலர் பதவிகள் உள்ளன. இதில் காங்கிரஸ் கட்சிக்கு 3, விடுதலை சிறுத்தைகள் கட்சி ஒன்று, மார்க்சிஸ்ட் கம்யூனிஸ்ட், இந்திய கம்யூனிஸ்ட் கட்சிகளுக்கு தலா ஒரு இடங்கள் ஒதுக்கப்பட்டுள்ளது. மீதமுள்ள 132 இடங்களில் திமுக போட்டியிடுகிறது.