திரும்பவுமா?... பண்டிகை காலத்தில் வெங்காய விலை கடுமையாக உயரும்: இல்லத்தரசிகளுக்கு ஷாக்..!

திரும்பவுமா?... பண்டிகை காலத்தில் வெங்காய விலை கடுமையாக உயரும்: இல்லத்தரசிகளுக்கு ஷாக்..!

தமிழக சந்தைகளில் ஆந்திரா, கர்நாடகா, மகாராஷ்டிரா மாநிலங்களிலிருந்து வெங்காயம் இறக்குமதி செய்யப்பட்டு வருகிறது. கடந்த 2019 இறுதியில் மேற்கண்ட மாநிலங்களில் மழை காரணமாக விளைச்சல் முடங்கி வெங்காய வரத்து மிகவும் குறைந்தது. இதனால் கடும் விலை உயர்வால் இங்குள்ள விற்பனையாளர்களும் குறைந்த அளவே வெங்காயத்தை கொள்முதல் செய்தனர்.

மேலும், வெங்காய விலை கிலோவுக்கு 200 ருபாய் வரையில் விற்பனை செய்யப்பட்டு வந்ததால் சில்லறை வியாபாரிகளும் பொதுமக்களும் கடும் இன்னலுக்கு ஆளாகினர். பின்னர் நிலைமை சீரானதும் ஒரு கிலோ வெங்காயம் 25 ரூபாய்க்கு விற்பனை செய்யப்பட்டு வெங்காய விலை இயல்பு நிலைக்கு திரும்பியது.

இந்த நிலையில், இந்தியாவில் பருவமழை சீராக இல்லாததால் வெங்காயத்தின் விலை செப்டம்பர்-நவம்பரில் மீண்டும் அதிகரிக்க வழிவகுக்கும் என்று கிரைசில் ஆய்வு மூலம் தெரிய வந்துள்ளது. மேலும், இந்தியாவில் இலையுதிர் காலத்தில் அல்லது குளிர்காலத் தொடக்கத்தில் அறுவடை செய்வதற்காகக் கோடைக் காலத்தின் தொடக்கத்தில் வெங்காயம் பயிரிடப்பட்டு வருகிறது.

இந்த காலத்தில் பருவமழை சீராக இல்லையென்றால் பயிர் அறுவடை செய்ய தாமதமாகும். அதன்படி, ஆகஸ்ட் 30, 2021 நிலவரப்படி பருவமழை 9 சதவீதமாக குறைந்துள்ளதாக கிரைசில் தெரிவித்துள்ளது. மேலும், இந்த காலத்தில் 75% வெங்காயம் அறுவடை செய்யப்படும். குறிப்பாக மகாராஷ்டிராவில் மட்டும் 35% உற்பத்தி செய்யப்பட்டு வருகிறது.

அத்துடன் மகாராஷ்டிராவில் வெங்காய பயிர் நடவு செய்வதில் ஏற்பட்டுள்ள சவால் காரணமாக கடந்த 2018 ஆண்டின் இதே நிலைமையை ஒப்பிடுகையில், இந்த ஆண்டும் வெங்காயத்தின் விலை 100 சதவீதம் அதிகரிக்க வாய்ப்புள்ளது என்றும் கிரைசில் சுட்டிக்காட்டியுள்ளது. மேலும் இந்தாண்டு மே மாதம் டாக்டே புயலினால் சேமித்து வைக்கப்பட்ட ராபி பயிர்களும் கடுமையாக பாதிக்கப்பட்டது.

பேரிடர் காரணமாக மகாராஷ்டிரா, குஜராத் மாநிலங்களில் ஈரப்பதம் அதிகமாகி வெங்காயத்தின் சேமிப்பு தாங்கும் சக்தி குறைவானது. இதனால் சப்ளை குறைவாகி விலை அதிகமாகும் என்று கிரைசில் ஆய்வு கூறுகிறது. இதன் காரணமாக வெங்காய இறக்குமதி குறைந்து பண்டிகைகாலமான அக்டோபர் - நவம்பரில் வெங்காய விலை உயரும் என்று எதிர்பார்க்கப்படுகிறது.