அனைவரையும் கண்காணிப்பேன்: முதல்வர் ஸ்டாலின் தடாலடி!
தமிழ்நாடு சட்டமன்றப் பேரவையில் விதி 110இன்கீழ் முதல்வர் ஸ்டாலின் வெளியிட்ட அறிவிப்புகள், அமைச்சர்களால் அவர்களது துறை சம்பந்தப்பட்ட மானியக் கோரிக்கைகளின்போது வெளியிடப்பட்ட அறிவிப்புகள் மற்றும் அரசு செயல்படுத்தி வரும் நலத் திட்டங்களின் செயல்பாடுகள் குறித்த ஆய்வுக் கூட்டம் தலைமை செயலகத்தில் முதல்வர் ஸ்டாலின் தலைமையில் நடைபெற்றது. கூட்டத்தில் தலைமை செயலாளார் மற்றும் அனைத்து துறை செயலாளர்கள் கலந்து கொண்டனர்.
அந்த கூட்டத்தில் பேசிய முதல்வர் ஸ்டாலின், அரசினுடைய அனைத்து முயற்சிகளுக்கும்
ஊக்கமாகவும், உறுதுணையாகவும் இருந்து கொண்டிருக்கக்கூடிய அரசுத் துறைச் செயலாளர்கள் அனைவருக்கும் அவரது நன்றியை தெரிவித்துக் கொண்டார்.
மேலும் அவர் பேசுகையில், “தேர்தல் வாக்குறுதிகள், சட்டமன்றத்தில் வெளியிடப்பட்ட அறிவிப்புகளை அனைத்தையும் படிப்படியாக நாம் நிறைவேற்றியாக வேண்டும். ஒவ்வொரு அறிவிப்பினை நிறைவேற்றுவதிலும் பல கட்டங்கள் இருக்கும். அதில் எவ்வித சிக்கலும் இல்லாமல் நிறைவேற்றப்பட வேண்டும். வாக்குறுதிகளை நிறைவேற்ற வேண்டும், அதில் பிரச்சினைகள் ஏதும் ஏற்பட்டுவிடாமல் நிறைவேற்றிட வேண்டும்” என்றார்.“நாம் நிதிநிலை அறிக்கையைத் தாக்கல் செய்துவிட்டோம். அடுத்து நமக்கு இருப்பது 6 மாதங்கள்தான். ஏனென்றால், அடுத்த 6 மாதங்களுக்குப் பிறகு சட்டமன்றத்தில் அடுத்த நிதிநிலை அறிக்கையைத் தாக்கல் செய்ய வேண்டும். ஆக, இந்த ஆறு மாதத்திற்குள் நாம் செய்துள்ள அறிவிப்புகளைச் செயல்படுத்திட வேண்டும். எனவே, விவேகமாகவும் வேகமாகவும் நீங்கள் காரியங்களை ஆற்றிடவேண்டும்” என்றும் ஸ்டாலின் அப்போது கேட்டுக்
கொண்டார்.
தொடர்ந்து பேசிய அவர், “நான் இந்த அறிவிப்புகள் செயல்படுத்துவது குறித்து அமைச்சர்களைக் கண்காணிப்பேன் என்று சட்டமன்றக் கூட்டத்தொடர் முடிந்தவுடன் சொல்ல ஆரம்பித்துவிட்டேன். இரண்டு நாட்களாக, நான் செல்கிற நிகழ்ச்சிகளில், கட்சி நிகழ்ச்சிகளாக இருந்தாலும், எந்த நிகழ்ச்சிகளாக இருந்தாலும், நானே நேரடியாகக் கண்காணிக்கப் போகிறேன் என்று சொல்லியிருக்கிறேன். எனவே, அமைச்சர்களை மட்டுமல்ல; ஒவ்வொரு துறைச் செயலாளர்களும் இந்த அறிவிப்புகளை குறித்த காலத்திற்குள் முடிக்கக்கூடிய வகையில் என்னுடைய கண்காணிப்பு இருக்கும் என்பதை நான் தெரிவித்துக்கொள்ள விரும்புகிறேன்” என்றும் ஸ்டாலின் தெரிவித்துள்ளார்.
No comments:
Post a Comment