முதல்வர் ஸ்டாலின் வீட்டில் இன்று டும் டும் டும்: சூப்பர் சர்ப்ரைஸ்!

முதல்வர் ஸ்டாலின் வீட்டில் இன்று டும் டும் டும்: சூப்பர் சர்ப்ரைஸ்!

ஒவ்வொரு கட்சியினரும் தங்களது இல்லத் திருமணத்துக்கு கட்சித் தலைவரை அழைக்க விருப்பம் தெரிவிப்பார்கள். தலைவர்களும் மணமக்களை வாழ்த்தவும், பொது மக்களை, தொண்டர்களை பார்க்கவும் அந்நிகழ்வை பயன்படுத்திக் கொள்வார்கள்.

அதிலும் திமுகவைப் பொறுத்தவரை திருமண நிகழ்ச்சிகளில் கட்டாயம் அரசியல் பேசுவார்கள். அதற்கு நீண்ட வரலாறே உள்ளது. தற்போது கொரோனா பரவல் காரணமாக திருமண நிகழ்ச்சிகளை நடத்துவதில் கட்டுப்பாடுகள் விதிக்கப்பட்டுள்ளன.

திருமண நிகழ்வில் முதல்வர் ஸ்டாலின் கலந்துகொண்டால் பெரிய கூட்டம் கூடும் என்பதாலும், சட்டமன்ற பட்ஜெட் கூட்டத்தொடர் நடைபெற்று வருவதாலும் திருச்சி மாவட்டம், ஸ்ரீரங்கம் சட்டமன்றத் தொகுதி எம்.எல்.ஏ. பழனியாண்டி மகனின் திருமணம் இன்று (செப்டம்பர் 10) தமிழ்நாடு முதல்வர் மு.க. ஸ்டாலின் இல்லத்தில் நடைபெறும் என அறிவித்துள்ளார்.

சென்னை சித்தரஞ்சன் சாலையில் அமைந்துள்ள தமிழ்நாடு முதல்வரும், திமுக தலைவருமான மு.க. ஸ்டாலினின் இல்லத்தில் 50 பேர் முன்னிலையில் இத்திருமணம் நடைபெறவிருப்பதாக தெரிவிக்கப்பட்டுள்ளது. மேலும், வரும் 12ஆம் தேதி திருச்சி வயலூர் பகுதியில் இத்திருமண நிகழ்ச்சியின் வரவேற்பு நடைபெறவுள்ளதாகவும் தெரிவிக்கப்பட்டுள்ளது

இதுகுறித்து ஸ்ரீரங்கம் எம்.எல்.ஏ. பழனியாண்டி, தனது ட்விட்டர் பக்கத்தில், “எனது மகன் திருமண விழாவில் அனைவரும் பங்கேற்று மணமக்களை வாழ்த்தவும் தலைவர் மு.க. ஸ்டாலின் மற்றும் அறிவாலயம் உத்தரவுப்படி நண்பர்கள், கழக தோழர்கள் யாரும் பிளக்ஸ் பேனர்கள் வைக்க வேண்டாம் என அன்புடன் கேட்டுக்கொள்கிறேன்” என்று பதிவிட்டுள்ளார்.