அரசு ஊழியர்கள் ஓய்வுபெறும் வயது 62: அரசு அதிரடி அறிவிப்பு!
அரசு ஊழியர்கள் ஒய்வு பெறும் வயதை 60இல் இருந்து 62 ஆக உயர்த்தி அறிவித்துள்ளது ஆந்திர மாநில அரசு.
ஆந்திராவில் அரசுத்துறையில் அதிகாரிகள் முதல், கடைநிலை ஊழியர் வரை, பணியாற்றி வரும் லட்சக்கணக்கானோரின் சம்பள விகிதம், ஒய்வூதியர் பங்களிப்பு, அரசு ஊழியர்கள் ஒய்வு வயது குறித்து முதன்மை செயலாளர் சமீர்ஷர்மா தலைமையில் பல்வேறு கட்ட பேச்சுவார்த்தை நடந்து வந்தது.
இந்நிலையில் நேற்று விஜயவாடாவில் உள்ள முகாம் அலுவலகத்தில் முதல்வர் ஜெகன்மோகன் ஊழியர் சங்கத்தினருடன் இணைந்து ஆலோசனை நடத்தினார்.
அப்போது அரசு ஊழியர்கள் ஓய்வுபெறும் வயது 60இல் இருந்து 62ஆக அதிகரிக்கப்படும் என அறிவித்தார். தொடர்ந்து பேசிய அவர், “அரசு ஊழியர்களுக்கான ஊதிய திருத்த ஆணையத்தின்படி, அடிப்படை ஊதியம் 23 சதவீதமாக உயர்த்தி கடந்த 1ஆம் தேதி முதல் நடைமுறைபடுத்தப்படும். இந்த முடிவால் அரசுக்கு ரூ.10,247 கோடி கூடுதல் சுமை ஏற்பட உள்ளது.
அரசு ஊழியர்களின் ஓய்வு வயது 60ல் இருந்து 62 ஆக உயர்த்தப்பட உள்ளது. கொரோனாவால் இறந்த அரசு ஊழியர்களின் குடும்பத்தினருக்கு ஜூன் 30ஆம் தேதிக்குள் கருணை அடிப்படையில் பணி நியமனம் செய்யப்படும். ஜெகன் அண்ணா ஸ்மார்ட் டவுன்ஷிப்ஸ்- லே அவுட்களில் 10% மனைகள் ஒதுக்கீடு செய்யப்படும். வீடற்ற அரசு ஊழியர்களுக்கு 20% தள்ளுபடி வழங்கப்படும்” என்று அறிவித்தார்.
முதல்வர் ஜெகன்மோகனின் இந்த அறிவிப்பு அரசு ஊழியர்களிடையே பெரும் வரவேற்பை பெற்றுள்ளது. அதே நேரத்தில் இளைஞர்களுக்கான வேலைவாய்ப்பு தடுக்கப்படுவதாக விமர்சனங்களும் எழுந்துவருகின்றன.
தமிழகத்தில் அரசு ஊழியர்கள் ஓய்வுபெறும் வயது 58ஆக இருந்த நிலையில் எடப்பாடி பழனிசாமி முதல்வராக இருந்தபோது இருமுறை அதை உயர்த்தி 60ஆக அதிகரித்தார். ஓய்வுபெறும்போது ஊழியர்களுக்கு வழங்கவேண்டிய ஓய்வூதிய பலன்களை கொடுப்பதை தற்காலிகமாக தள்ளிப் போடுவதற்காகவே ஓய்வுபெறும் வயது அதிகரிக்கப்பட்டதாக கூறப்பட்டது.
மு.க.ஸ்டாலின் தலைமையிலான அரசும், ஊழியர்களின் ஓய்வுபெறும் வயது குறித்து ஆலோசனை செய்து வருவதாக ஏற்கெனவே தகவல்கள் வெளியானது குறிப்பிடத்தக்கது.
No comments:
Post a Comment